ALAS, 30 setembru 2019 (TATOLI)- Polisia Nasionál Timor-Leste (PNTL) Eskuadra Alas, Munisípiu Manufahi, tinan haat ona enfrenta la iha transporte hodi fasilita sira nia serbisu iha terrenu.
Komandante PNTL Eskuadra Alas, Munisípiu Manufahi, Inspetór Carlos Hornay, informa, ida duni karreta ida mak fasilita operasaun PNTL Alas nian, mas avaria tiha ona.
Ba Ajénsia TATOLI, sesta (27/09/2019), iha Alas, Inspetór Carlos Hornay, hateten, difikuldade boot ba PNTL Alas atu hala’o nia responsabilidade operasaun to’o area remotas, mak la iha transporte. Ho nune’e, difisil tebes atu PNTL halo atuasaun ho lalais bainhira mosu problema ka perturba orden públiku iha aldeia no area remotas sira iha area jurizdisaun Alas nian.
“Bainhira kazu ruma akontese laiha karreta atu tula suspeitu sira uza de’it motor ou haruka sa’e karreta privada ka bele mós haruka la’o ain, ita tula suspeitu sira ho motor bele fó impaktu ba parte seguransa,” hateten Inspetór Carlos Hornay.
Postu Eskuadra Alas iha motorizada haat ne’ebé koloka ba Ofisiál Polisiamentu Suku (OPS), enkuantu Komandante Eskuadra no ajente PNTL seluk uza de’it motorizada privada.
Komandante Eskuadra ne’e relata liután, karreta ne’ebé daudaun ne’e avaria kuaze tinan haat hahú 2015 agora tanba karreta ne’e mai husi apoiu UNTAET.
Nia hateten, difikuldade ne’e relata ona ba Komandu PNTL Munisípiu Manufahi no Komandu PNTL Nasionál, maibé seidauk hetan resposta tanba ne’e inspetór Polisia Carlos Hornay rekomenda ba Governu atu konsidera iha planu OJE 2020 hodi rezolve situasaun falta transporte.
Maske enfrenta situasaun ne’e, maibé Komandante Eskuadra Alas ne’e hatete la sai obstákulu boot ba PNTL Eskuadra Alas atu kontinua serbí instituisaun hodi asegura pás no trankulidade iha komunidade.
PNTL Eskuadra Alas iha membru hamutuk 14 maka destakadu hodi fó seguransa ba komunidade.
Jornalista : Nelson de Sousa
Editór : Francisco Simões
