ALAS, 30 setembru 2019 (TATOLI)-Sentru Saúde Alas, Munisípiu Manufahi, kontinua fó tratamentu saúde ba komunidade sira to’o sira nia hela fatin liuhusi implementasaun programa Servisu Integradu Saúde Komunitária) SISKA, Mobile Klínika no Vizita Saúde iha Família ho rutina iha Postu Administrativu Alas.
Notísia Relevante : Janeiru-Setembru, Sentru Saúde Alas Rejista Pasiente Rihun 15
Programa tolu ne’e ho ninia objetivu maka lori fasilidade saúde ba komunidade sira ne’ebé hela iha área remotas ka dook husi postu saúde no sentru saúde.
“Programa ne’e ita hala’o rutina semanál no kada fulan ba iha Suku no Aldeia, atu oinsá lori fasilidade saúde hakbesik ba komunidade hodi hetan tratamentu,” informa Xefe Sentru Saúde, José Martins da Costa ba Ajénsia TATOLI, iha Alas, sesta (27/09/2019).
Programa tolu ne’e, nia esplika, oinsá atu fó intervensaun sedu no lais liu ba moras hada’et sira hanesan Tuberculose (TBC-sigla Indonézia, hepatitis no moras sira seluk.
Alende tratamentu saúde, Sentru Saúde Alas mós hala’o promosaun saúde ba labarik vulneravel sira ne’ebé enfrenta problema má nutrisaun.
“Atividade promosaun hala’o mós ba eskola primária kona-ba hygiene hodi fó koñesimentu oinsá mak tesi liman kukun, fase liman ho sabaun molok han, tanba ne’e importante ba labarik sira nia saúde,” José Martins da Costa tenik.
Postu Administrativu Alas, Munisípiu Manufahi, iha sentru Saúde ida, Postu Saúde neen ho pesoál saúde hamutuk na’in 18; kompostu husi médiku jerál na’in neen, Enfermeiru na’in haat, parteira na’in tolu, laboratóriu na’in rua ho Farmasista na’in tolu.
Sentru Saúde Alas kobre suku lima hanesan Aituaha, Dotik, Mahakida,Taituda no uma Berloi.
Sentru Saúde ne’e sei enfrenta menus rekursu uman tanba ne’e husu ba Ministériu Saúde atu destaka tan médiku Jerál, Parteira no enfermeiru hodi reforsa servisu iha fatin ne’ebá.
Iha tinan oin, Ministériu Saúde atu tau iha planu OJE 2020 hodi sosa ambulánsia foun ba Sentru Saúde Alas tanba daudaun ne’e iha karreta ida maibé kondisaun tuan ona no piór liu dala barak avaria bainhira halo evakuasaun ba moras sira.
“Problema ne’e ami hato’o ona ba Ministériu Saúde Munisípiu iha tinan hirak liu ba, no sempre hato’o mós ba nain ulun sira bainhira vizita sentru saúde ne’e, maibé seidauk iha resposta, ne’ebé ami hein iha tempu oin bele apoiu,” José hateten.
Jornalista : Nelson de Sousa
Editór : Francisco Simões
