Deputadu Khunto, Antonio Verdial.Imajen/Antonio Goncalves

DILI, 30 setembru 2019 (TATOLI) – Bankada Kmanek Haburas Unidade Timor Oan (KHUNTO) iha Parlamentu Nasionál, reklama pasta Ministériu Interiór.

“Ita hein to’o bainhira? Loron ba loron ita dada malu kle’ur tebes. Karik bele lalais hakotu impase polítika ida ne’e. Hahú hosi formasaun Governu dehan katak pasta Ministériu Interiór fó ba partidu KHUNTO, maibé to’o ohin loron la realiza tuir kompromisu Aliansa Mudansa ba Progresu (AMP)”, Deputadu Bankada KHUNTO, António Verdial, informa liuhosi plenária Parlamentu Nasionál, segunda ne’e.

Nia afirma, polítika pasiénsia hamosu konsekuénsia todan ba vida nasaun nian, liliu povu hein hela dezenvolvimentu.

Hatán ba preokupasaun ne’e, Ministru Reforma Lejizlativa no Asuntu Parlamentár (MRLAP), Fidelis Manuel Leite Magalhães, hateten bankada KHUNTO bele reklama ba Prezidente Repúblika, Francisco Guterres ‘Lú Olo’.

“Bankada KHUNTO bele konfirma ba Prezidente Repúblika. Kestaun prinsipál iha tomada pose. Se tomada pose avansa, buat hotu-hotu laiha problema”, esplika Ministru Fidélis.

Jornalista: Evaristo Soares Martins

Editór: Xisto Freitas


HAKEREK NO HATÁN

Please enter your comment!
Please enter your name here