Autoridade Nasionál ba Expo Dubai , Francisco Kalbuadi Lay. Imajen Tatoli/Egas Cristovão

DILI, 30 setembru 2019 (TATOLI) – Autoridade Nasionál ba Expo Dubai 2020, Francisco Kalbuady Lay, hasoru malu ho Primeiru-Ministru (PM), Taur Matan Ruak, hodi aprezenta preparasaun Timor-Leste  iha eventu internasionál ne’e.

“Ohin ha’u hasoru malu ho Primeiru-Ministru hodi ko’alia kona-ba preparasaun Expo Dubai nian. Ne’ebé ha’u relata hela ba”, tenik Kalbuadi iha Palásiu Governu, segunda ne’e.

Nia haktuir, iha enkontru ne’e, Xefe Governu fó orientasaun atu bele hala’o servisu ne’e ho di’ak tanba eventu ne’e parte ida atu promove Timor-Leste iha rai-liur.

Notísia Relevante: TL Prontu Partisipa Iha Expo Dubai Promove Produtu ba Mundu

Kona-ba orsamentu, nia dehan sei iha diskusaun laran tanba presiza define didi’ak atividade hirak mak Timor-Leste sei aprezenta hafoin autorizasaun husi Komisaun Organizadora Expo Dubai 2020.

“Agora sei faze preparasaun de’it enkuantu orsamentu sei tinan oin. Totál hira ne’e tékniku hosi komisaun organizadora sira hamutuk ho finansa mak haree,” dehan Kalbuadi.

Antes ne’e, Governu liuhosi reuniaun Konsellu-Ministru, Kuarta (12/6), aprova despaixu hosi PM Taur, hodi nomea Francisco Kalbuadi Lay, atuál Sekretáriu Jerál Partidu partidu CNRT nu’udar Autoridade Nasionál ba Expo 2020 Dubai, Emiradu Árabe Unidu.

Notísia Relevante: Timor-Leste sei Promove Identidade Soberania Iha Expo Dubai

Eventu mundiál ne’e  sei hala’o hosi loron 20 outubru 2020 to’o loron 10 abríl 2021, durante fulan-neen nia laran.

Kalbuadi antes ne’e halo ona vizita ida ba Dubai hodi haree sítiu ne’ebé atu realiza Expo 2020. Iha vizita ne’e, Governu Dubai apoia fatin no fó asisténsia ba Governu Timor-Leste atu partisipa Expo atu promove-aan ba mundu.

Área ba Expo ne’e kuaze etare 438 (1.080 ac) iha Dubai Exhibition Center, no sei partisipa husi nasaun 192 inklui Timor-Leste ho previzaun kuaze vizitante millaun 25.

Jornalista: Hortençio Sanchez

Editór: Xisto Freitas

 

HAKEREK NO HATÁN

Please enter your comment!
Please enter your name here