Treinadór AS Ponta Leste, Eduardo Pereira. ImajenLFA

DILI, 30 setembru 2019 (TATOLI) – Treinadór prinsipál Selesaun Nasionál U-19, Eduardo Pereira preokupa ho fasilidade treinamentu ne’ebé ladún sufisiente hodi difikulta jogadór selesaun nasionál sira hala’o treinamentu.

“Problema ida ba ami mak hanesan fasilidade treinamentu ninian, liliu parte kampu. Dalaruma ita-nia ki’ik-oan sira hosi Sentru Juvenil ne’e hala’o treinamentu kle’ur demais entaun dada tempu halo ami hala’o treinamentu oras uituan liu,” tenik Eduardo ba Agência Tatoli, iha nia kna’ar fatin, Dili, segunda ne’e.

Nia dehan, hanesan treinadór tenke prepara matéria barak hafoin fó treinamentu ba jogadór sira entaun tenke presiza tempu naruk.

Entretantu, atuál treinadór klube AS Ponta Leste ne’e hetan fiar hosi Federasaun Futeból Timor-Leste (FFTL) hodi lidera Selesaun Nasionál U-15, atu partisipa iha jogu kualifikasaun Asian Football Confederation (AFC) ne’ebé sei hala’o novembru mai ne’e iha Indonézia hodi prepara ba 2020.

Maski iha difikuldade maibé treinadór ne’e kontinua esforsu hodi hala’o nafatin treinamentu.

“Jogadór hamutuk 43 mak hala’o hela treinamentu maibé ita sei hili na’in 30 hanesan ne’e de’it bainhira halo selesaun. Maski difikuldade oioin maibé ha’u iha planu ona Liga ne’e hotu ona entaun ami sei hala’o treinamentu maka’as liután atu nune’e bele halo selesaun ona,” dehan Eduardo.

Enkuantu, tuir oráriu ne’ebé iha, Timor-Leste grupu hamutuk ho Indonézia, Honkong no Korea Súl.

Jornalista: Hortencio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here