DILI 30 setembru 2019, (TATOLI) – Diresaun Nasionál Kontabilidade no Regulasaun Finanseira (DNKRF) Ministériu Finansa (MF) realiza formasaun durante semana ida ho objetivu kapasita funsionáriu ajénsia autónoma ne’ebé hala’o kna’ar iha área kontabilidade no relatóriu finanseira.

“Formasaun ne’e atu kapasita funsionáriu ne’ebé servisu iha área finansa liuliu ida ne’ebé maka servisu iha kontabilidade no regulamentu finanseira nian. Treinamentu ida ne’e presiza hala’o bazeia ba monitorizasaun ba desentralizasaun ba iha ajénsia autónoma tuir fali munisípiu no mós liña ministériu sira. Diresaun Jerál Tezouru sira halo mós monitorizasaun atu haree oinsá lala’ok desentralizasaun ne’ebé hala’o hosi ajénsia autónoma, munisipiu no liña ministériu sira”, afirma Diretora Jerál Tezouru interina, Regina de Jesus Soares iha Aitarak-Laran, ohin.

Regina de Jesus Soares esplika katak bazeia ba monitorizasaun ne’e nota katak ajénsia autónoma sira no mós munisipiu sira sei iha koñesimentu mínimu, liuliu iha área kontabilidade no regulamentu finanseira nian.

Nune’e bazeia ba rezultadu ne’e, ekipa Diresaun Jerál Tezouru ne’ebé atu tun bá halo monitorizasaun sira nota katak tezouru presiza halo buat ruma atubele aumenta kapasidade ne’ebé kle’an atubele hala’o funsaun ne’e ho di’ak iha futuru.

Diretora Jerál interina dehan, dala barak rona katak membru Parlamentu sira kestiona ajénsia autónoma sira prepara sira-nia relatóriu rasik tanba ne’e maka tenke prepara sira ho di’ak atubele iha koñesimentu di’ak molok prepara sira-nia relatóriu finanseira tuir prosedimentu sira ne’ebé iha.

Nune’e nia husu ba partisipante sira atu partisipa másima, la’ós de’it ho lista prezensa maibé tenke rona no komprende didi’ak materiál ne’ebé aprezenta, nune’e hanesan bukae ida hodi lori fila bá serbisu fatin hodi hala’o serbisu di’ak liután iha futuru.

Formasaun ne’e ba dala rua ona, primeiru hala’o ona iha munisipiu 12 iha maiu 2019, no iha etapa daruak ne’e partisipa hosi ajénsia autónoma 11 no matéria ne’ebé aprezenta liuhosi video.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here