Ministra Edukasaun, Juventude no Desportu Dulce de Jesus Soares .Imajen/TATOLI

DILI, 30 Setembru 2019(TATOLI)- Ministra Edukasaun Juventude no Desportu (MEJD), Dulce de Jesus Soares konsidera katak disionáriu Portugés-Makasa’e no Makasae-Portugés ne´ebé mak prodús husi Amu Dom Carlos Filipe Ximenes Belo, Eis-Bispo Dioseze Dili, hodi ajuda labarik barak iha área remota husi parte lorosa’e ne’ebé la ko´alia lian tetun.

“Entaun  ho disionáriu  ne’e bele ajuda sira komprende no ajuda sira-nia prosesu aprendijazen lian portugés. Projetu implementa língua materna iha eskola ne´e sala, no projetu la´ós atu implementa língua materna iha eskola maibé atu uza disionáriu hodi ajuda estudante sira-nia prosesu aprendizajen língua portugeza iha eskola” hateten Ministra Dulce de Jesus Soares ba jornalista sira iha edifísiu MEJD, Vila-Verde, ohin.

Ministra Dulce mós haktuir katak projetu pilotu lian materna ne’e hahú 2011 iha Munisípiu Lospalos, Manatuto no Oekusse. Dezde 2011 iha projetu pilotu iha eskola sanulu resin rua ne’ebé rua iha Lospalos ho lian Fataluku, rua iha Manatuto ho lian Galolen, no iha mós eskola balun iha Oe-cusse.

“Entaun projetu ne’e la´o hela maibé atu hateten katak  ami iha komunikasaun ho Dom Carlos Filipe Ximenes Belo kona-ba dsionáriu ne’ebé halo husi Amu Belo rasik no disionáriu ne’e halo foka liuliu ba labarik timoroan sira ne’ebé  uza lian Makasae atu nune’e bele ajuda estudante oan sira hodi komprende di´ak liu tan lian portugés,” insiste governante ne´e.

Jornalista: Nelia Borges

Editór      : Rafy Belo 

HAKEREK NO HATÁN

Please enter your comment!
Please enter your name here