DILI, 29 setembru 2019 (TATOLI) – Liga Futeból Amadora (LFA) iha kada époka sempre mai ho istória ne’ebé diferente. Iha époka 2019 ne’e, taka ho istória foun no interesante tanba ekipa ida ne’ebé mai hosi Terseira Divizaun mak sai kampiaun.
Sekretáriu Jerál LFA, Lexy Vong hateten vitória ne’ebé ekipa promovidu Primeira Divizaun, Lalenok United FC ne’e gaña hatudu katak jogadór timoroan prepara-aan ona hodi lori futeból ba oin liuhosi sira-nia talentu ne’ebé di’ak.
“Tinan ida ne’e, istória ida ne’ebé interesante tebes. Hosi ida ne’e mak ita bele haree katak jogadór timoroan sira iha duni ona vontade hatudu sira-nia talentu ne’ebé di’ak. Entaun, presiza investimentu ida ne’ebé di’ak iha área futeból,” tenik Lexy iha Estádiu Munisipál Dili, domingu ne’e.
Lee mós: Yance Susesu Lori Lalenok Kampiaun LFA 2019
Tanba ne’e, nia hatutan, LFA tenta serbisu maka’as nafatin atu lori futeból ba oin maski hasoru difikuldade maka’as.
“Ita tenke serbisu maka’as duni atu lori futeból ne’e ba oin nune’e bele hadi’a di’ak liután futeból iha ita-nia rai maski difísil,” dehan Lexy.
Nia informa, époka ida ne’e espasu ida ne’ebé di’ak tebes tanba árbitru mai hosi Asian Football Confederation (AFC) biar lidera de’it jornada tolu.
Nune’e, nia husu ba parte hotu atu serbisu hamutuk lori futeból ba oin ho di’ak liu maski neineik maibé tenke beibeik la’o.
Jornalista: Hortençio Sanchez
Editór: Xisto Freitas
