Jogadór no estrutura Lalenok United FC festeja vitória ne'ebé sira hetan iha Primeira Divizaun LFA époka 2019. Imajen Mídia LFA

DILI, 29 setembru 2019 (TATOLI) – Ekipa estimadu Lalenok United FC ne’ebé sai hanesan vensedór ba Primeira Divizaun Liga Futeból Amadora (LFA) époka 2019, simu prémiu ho osan $15.000 no tasa.

Vitória Lalenok marka istória foun ida iha LFA, basá ekipa refere hahú hosi Terseira Divizaun hakat ba Segunda Divizaun no ba Primeira Divizaun konsege sai kedas kampiaun maski hasoru klube zigante barak.

Prezidente Lalenok United FC, Pedro Belo orgullu no agradese ba ekipa tomak ne’ebé serbisu maka’as to’o lori ekipa foun ne’e ba vitória.

“Ha’u agradese tebes ba ha’u-nia ofisiál klube sira, treinadór no jogadór hotu ne’ebé la sente kolen hodi esforsu-aan maka’as to’o lori Lalenok ba vitória,” tenik Pedro Belo iha Estádiu Munisipál Dili, domingu ne’e.

Aleinde ne’e, nia hato’o mós agradese ba ekipa LFA, árbitru ne’ebé serbisu maka’as hodi organiza jogu hirak ne’e la’o di’ak to’o ramata biar mosu fallansu ki’ik-oan balun.

Iha parte seluk, nia hakruuk ba adeptu Lalenok hotu ne’ebé sempre apoiu ekipa refere la sente kolen.

Nia promete katak, ba oin, sei hadi’a ekipa Lalenok sai hanesan klube famozu iha Timor-Leste no bele hetan lisensa hosi Asian Football Confederation (AFC).

“Ba futuru, klube ne’e sei sai famozu liután. Ami prepara ona dokumentu atu submete ba hasai lisensa klube nian. Ha’u fiar katak Federasaun Futeból Timor-Leste no Liga Futeból Amadora sei serbisu maka’as liután hodi ami bele hetan lalais lisensa ida ne’e. Dokumentu sira ami prepara hotu ona. Hela de’it balun mak seidauk maibé prosesu hela,” tenik Pedro.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here