Daniel Adadi (loos) simu prémiu hosi LFA nu'udar mellór markadór. Prémiu ne'e entrega hosi Sekretáriu Estadu Juventude no Desportu, Nélio Isaac Sarmento. Imajen Mídia LFA

DILI, 29 setembru 2019 ( TATOLI) – Avansadu klube Assalam FC, Daniel Adadi (10), sidadaun Gana, sai mellór markadór iha Primeira Divizaun Liga Futeból Amadora (LFA) époka 2019.

Daniel Adadi sai mellór markadór tanba iha jogu dala sanulu resin-haat konsege marka golu 13, hodi ultrapasa nia amigu Rafael Marti ne’ebé marka de’it golu 10, Fábio Christian Cotinho 10 no jogadór timoroan Edit Sávio 8.

Tanba ne’e, LFA haraik prémiu ba eis jogadór Karketu Dili FC ne’e ho montante $1000.

Simu tiha prémiu, ba Agência Tatoli, Adadi hateten nia la espera bele sai mellór markadór tanba jogadór barak mak joga.

“Ha’u sente kontente bele sai mellór markadór. Ha’u la mehi atu hetan ida ne’e maibé ohin hetan liuhosi ha’u-nia esforsu hotu,” nia haktuir.

Antes ne’e, iha époka kotuk liubá, Fábio Christian hosi kontinente Amérika Latina mak sai mellór markadór no époka ida ne’e jogadór hosi kontinente Áfrika.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here