Lansamentu album "Knananuk Murak, Dame iha Klamar". Imajen Tatoli/Hortençio Sanchez

DILI, 28 setembru 2019 (TATOLI) – Grupu Banda Múzika Sacarbimul, sábadu ne’e, iha edifísiu Sekretaria Estadu Juventude no Desportu (SEJD), Lecidere, Dili, hala’o primeru lansamentu ba album ho formatu Compact Disc (CD).

Iha album ne’e,  múzika hamutuk 11 ne’ebé hananu hosi artista timoroan na’in rua, Cidália Gonçalves no Gerson Oliveira.

Album foun ne’e, hetan suporta hosi SEJD no mós patrosina hosi kompañia Natural Multimedia Production no Jenifer Fundation.

Sekretáriu Estadu Juventude no Desportu, Nélio Isaac Sarmento, agradese ba artista timoroan ne’ebé iha inisiativa prodúz ona album foun.

“Agradese ba imi hotu. Imi iha inisiativa ne’ebé di’ak hodi prodúz ona album foun. Maioria joven Timor-Leste iha talentu barak halai liubá múzika,” tenik Nélio.

Nia dehan, maski talentu arte múzika foinsa’e sira-nian maka’as maibé espasu mak laiha atu foinsa’e sira bele espresa talentu hirak ne’e ho di’ak.

“Ita hahú ho grupu ida ne’e. Grupu ida ne’e mós la’ós foun maibé mai hosi artista koñesidu sira iha Timor. Fiar katak inisiativa sira-nian ne’e bele enkoraja grupu múzika seluk iha Timor-Leste bele book-aan,” katak Nélio.

Iha biban ne’e, kantór Gerson Oliveira espresa nia sentimentu kontente tanba bele hamutuk ho nia maluk artista seniór hotu prodúz ona album foun ne’e.

“Sente orgullu tebes tanba bele prodúz ona albun foun. Maibé, konvida nafatin maluk artista timoroan sira hotu mai ita hamutuk hodi valoriza no dignifika proprietáriu ba obra artista ida-idak nian nune’e bele promove di’ak liután múzika Timor-Leste ba mundu,” Gerson haklaken.

Nia hatutan, ho produsaun album foun ne’ebé ho lema “Knananuk Murak, Dame iha Klamar” bele lori mensajen pozitivu ba ema hotu-hotu nia moris nune’e bele valoriza di’ak liután knananuk Timor Leste.

Jornalista: Hortençio Sanchez

Editór: Xisto Freitas

1 KOMENTÁRIU

HAKEREK NO HATÁN

Please enter your comment!
Please enter your name here