MANUFAHI, 27 setembru 2019 (TATOLI)-Xefe Suku Matorek, Postu Administrativu Turiskai, Munisípiu Manufahi, Lucas Viera, hatete, komunidade Matorek enfrenta hela difikuldade ba asesu fasilidade saúde tanba suku refere seidauk iha postu saúde.
Alende falta postu saúde, Suku Matorek ho uma kain 100-resin, total abitante 500-resin husi Aldeia Fohotur, Faturei, Rimori no Orluli mós seidauk asesu liña eletrisidade.
“Ha’u hakarak husu iha Orsamentu Jerál Estadu (OJE) 2020 atu tau prioridade hodi loke postu saúde iha ami nia suku,” hateten Lucas Viera, ohin, Same Villa.
Nia fó sasin katak, durante ne’e komunidade sira tenke lao ain ho distánsia kilo metru 12 hodi to’o ba postu saúde ne’ebé estabelese ona iha Suku Liurai hodi hetan tratamentu saúde.
“Susar liu mak inan feton sira bainhira atu partu tenke transporta mai iha sentru saúde Turiskai no kondisaun estrada la di’ak difikulta tebes,” informa Lucas Viera.
Kona-ba fasilidade eletrisidade, autoridade lokál ne’e klarifika iha tinan hirak liubá Governu distribui ona solár painél ba komunidade sira, maibé maioria avaria ona.
“Komunidade balun ne’ebé iha osan tenke sosa solár panel, maibé komunidade ne’ebé laiha kbiit la bele sosa entaun iha tempu kalan kontinua tur iha nakukun laran,” Lucas hateten.
Xefe Suku Matorek, Lucas Viera husu ba governu da-ualu atu rejista preokupasaun komunidade nian ne’e hodi tau iha planu Orsamentu Jerál estadu 2020.
Jornalista : Nelson de Sousa
Editór : Francisco Simões
