DILI, 27 setembru 2019 (TATOLI)-Prezidente Pt. Dirgantara Indonézia, Elfien Goentoro hamutuk ho nia ekipa realiza enkontru kortezia ho Sekretáriu Estadu Komunikasaun Sosiál (SEKOMS), Merício Juvinal dos Reis Akara, ohin, hodi introdús sira-nia hanoin no planu oinsa bele mós halo investimentu iha Timor-Leste (TL).

“Enkontru preliminár para koñese malu, para ba oin bele kontinua halo diskusaun, komunikasaun, hanesan membru governu reprezentante oitavu governu konstituisional ne’ebé simu mós ita-nia bainaka. Ha´u dehan katak Oitavu Konstitusionál nia polítika mak hakarak nakloke ba investimentu,” dehan Sekretáriu Estadu Merício Akara ba jornalista sira iha Palásiu Governu, ohin.

Governante ne´e hateten katak ita tenke hanoin atu kria kampu traballu barak ba ita-nia joven sira, entaun ita-nia bainaka sira husi li´ur, liuliu husi ita-nia nasaun viziñu ne’ebé iha interese atu halo kooperasaun, halo investimentu ruma.Governu nakloke ba komunikasaun kona-ba ida ne’e.

“Balun maka iha mós fokus ba setór komunikasaun ni’an, ne’ebé liga mós ba responsabilidade mak ha’u iha, sei ko’alia tan ho sira no oinsá área komunikasaun bele iha tan kooperasaun atu dezenvolve ita-nia área komunikasaun di’ak liu”.

Iha parte seluk, Prezidente Elfien Goentoro hateten: “Ami husi Indonézia área indústria estratezia. Ami fahe esperénsia uitoan atu ajuda dezenvolve indústria no konetividade ne’ebé iha Timor-Leste no mós dezenvolvimentu ba infraestrutura”.

Indústria no konetividade, tuir Prezidente Elfien Goentoro mak hanesan indústria radar, ró, elektrónika no mós komunikasaun.

“Ami mós iha esperiénsia iha ne’ebá, ministru mós ko’alia tiha ona ho ami-nia ministru iha Indonézia, iha parte hanesan hadi’a dalan ho seluk tan. Ami iha kompañia dinámiku, ne’ebé bele ajuda dezenvolve indústria iha Timor-Leste,” dehan prezidente ne’e.

Maske nune´e, nia mós konsidera katak sira iha mós  indústria ne’ebé bele aproveita husi Governu Timor-Leste; iha área dezenvolvimentu, infraestrutura, ekonomia no seluk tan.“Ami foin primeira vez hasoru ministru no ministru sei haree didi’ak no dala ruma sei konvida fila fali ami,”  nia konklui.

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here