Responsavel Tékniku Empreza Ceslink Moniz Maia. Imajen/Tatoli.

DILI, 27 Setembru (TATOLI) – Responsavel Tékniku husi Empreza Ceslink, Moniz Maia, informa preparasaun Ceslink atu sai operadór telekomunikasaun dahaat iha Timor-Leste atinje ona porsentu 95.

“Daudaun ne’e, ami-nia preparasaun ein termu fíziku no teknikamente atinje ona porsentu 95 no ami hein de’it desizaun ANC nian ba atribuisaun ba frekuénsia no númeru telefone bainhira sira atribui ona ida ne’e, Ceslink sei lansa parese iha tinan ne’e, fulan-novembru no dezembru”, dehan nia ba Tatoli iha nia knaar fatin Bidau, ohin.

“Ami-nia preparasaun iha Dili laran de’it, tanba bazeia ba enkontru ho Konsellu Ministru foin daudaun ne’e, ami-nia prioridade maka oinsá konstrui uluk operadór ne’e iha Dili, tanba baze ba operadór Ceslink Dili sai prioridade”, dehan Moniz.

Bainhira ANC atribui ona frekuénsia no númeru no mós emite ona lisensa ofisiál katak Ceslink bele lansa ona, entaun iha ne’e maka Ceslink sei halo nian expansaun bá munisípiu.

Nia salienta iha área Dili de’it torre ba komunikasaun Ceslink nian kuaze 14 maka monta hotu ona no garante hafoin lansamentu bele kobre ba populasaun iha kapitál.

“Ami garante sei fó atendimentu di’ak ba públiku no fó satisfasaun ba populasaun iha Dili”, haktuir responsavel tékniku ne’e.

Moniz Maia afirma kona-ba dokumentu komprovativu nesesária sira ne’ebé maka sai hanesan rekizitu prinsipál hodi harii operadór ida, ne’e husi parte Ceslink rasik submete ona dezde iha 21 agostu ba ANC, no daudaun ne’e avalia no análize.

Ceslink mak operadór telekomunikasaun primeira husi emprezáriu timoroan ida ne’ebé investe hodi hakarak halo kompetisaun ho operadór tolu ne’ebé eziste uluk ona iha Timor-Leste.

Notísia relevante : ANC Sei Verifika Dokumentu Ceslink Antes Atribui Lisensa

Jornalista : Natalino Costa

Editora : Maria Auxiliadora

1 KOMENTÁRIU

HAKEREK NO HATÁN

Please enter your comment!
Please enter your name here