Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 26 setembru 2019 (TATOLI) – Prezidente Parlamentu Nasionál (PPN), Arão Noé de Jesus da Costa Amaral, informa kona-ba proposta alterasaun Lei Atividade Petrolífera (LAP) no Lei Fundu Petrolíferu (LFP), ne’ebé Tribunál Rekursu (TR) deklara inkonstitusionál iha artigu balun, daudaun ne’e Parlamentu Nasionál (PN) kontaktu ona Governu atu halo reapresiasaun iha plenária.

“Ami kontaktu ona Governu tanba sira mak inísia lei ne’e liuhosi Ministériu Petróleu no Minerál mak hanesan proponente ba proposta lei ne’e. Ami kontaktu sira katak Parlamentu iha tempu husi 7 to’o 8 outubru,” tenik Arão Noé iha PN, kinta ne’e.

Nune’e, membru PN sira sei haree no deside ajenda bainhira iha reuniaun líder bankada.

“Ami haree hela ida ne’e. Hafoin reuniaun líder bankada mak sei prevee atu debate iha plenária hodi hetan apresiasaun plenária nian ba dekretu rua ne’ebé Prezidente Repúblika veta bazeia ba desizaun Tribunál Rekursu nian”, nia subliña.

Antes ne’e, Arão Noé informa PN sei iha alternativa rua mak hanesan halo konfirmasaun votu ka alterasaun artigu hirak ne’ebé TR deklara inkonstitusionál.

TR nia desizaun ba lei rua ne’e akontese hafoin Prezidente Repúblika, Francisco Guterres Lú Olo husu Tribunál Rekursu halo fiskalizasaun konstitusionalidade ho independentemente.

Iha loron 27 agostu, Tribunál Rekursu deklara  inkonstitusionál artigu 22 alínea 9 husi Proposta Lei nú. 4/V Lei Atividade Petrolífera no artigu 15 alínea 1, 2 no 3 husi Proposta Lei nú.5/V (da-1), Lei Fundu Petrolíferu nian.

Artigu balun ne’ebé mak TR deklara inkonstitusionál ko’alia kona-ba oinsá kapitaliza Timor GAP, EP hodi hala’o investimentu maibé tuir regra no prosesu, la’ós direta.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here