Ministru Ensinu Superiór, Siénsia no Kultura, Longuinhos dos Santos. Imajen/TATOLI

DILI, 26 setembru 2019 (TATOLI) – Ministériu Ensinu Superiór, Siénsia no Kultura (MESSK) iha ona hanoin atu implementa kurríkulu padraun mínimu iha ensinu superiór públiku no privadu nune’e iha futuru bele uniformiza kurríkulu iha universitáriu hotu iha Timor-Leste.

Ministru Ensinu Superiór, Siénsia no Kultura, Longuinhos dos Santos, informa agora dadauk parte ministériu sei elabora hela.

“Prosesu agora dadauk ita iha faze elaborasaun no tinan ne’e ita finaliza hafoin tinan 2020 ita sei halo formasaun ba universidade tomak tantu públiku no privadu, liliu ba profesór sira ne’ebé atu hanorin nune’e bele uniformiza kurríkulu ida ne’e”, tenik ba jornalista sira iha Palásiu Governu, hafoin hasoru malu ho Primeiru-Ministru (PM), Taur Matan Ruak, kinta ne’e.

Inisiativa ne’e mosu tanba haree ba sistema aprendizajen ne’ebé ensinu superiór públiku no privadu adota lahanesan iha implementasaun ba kurríkulu, tanba Universidade Nacional Timor Lorosa’e (UNTL) uza lian portugés, enkuantu universidade privada sira uza lian Indonézia no lian seluk.

Tuir governante ne’e, iha orsamentu 2020 prevee ona atu halo formasaun ba dosente sira iha ensinu superior privadu no públiku.

“Ein jerál orsamentu ne’ebé mak ita tau millaun $7 no mós ita iha adisionál ne’ebé mak prevee millaun $2 resin, ba bolsu estudu nian prevee adisionál millaun $3”, nia informa.

Ministru ne’e dehan tan, intensaun hasoru Xefe Governu atu halo diskusaun kona-ba programa ne’ebé mak atu ezekuta ba tinan 2020 nian.

“Programa ne’ebé trasa husi Komisaun Revizaun Orsamentu Polítika nian sei fó ba Ministériu Ensinu Superiór, Siénsia no Kultura atu bele ezekuta programa foun atu bele trasa tuir planu ne’ebé mak iha.

Nia hatutan: “Prioridade ba ministériu mak sei haree liu ba infraestrutura, reforsa kurríkulu padraun mínimu, reforsa Institutu Politékniku Betano no reforsa funsionamentu Institutu Siénsia no Teknolójia”.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here