Logotipu MRLAP

ALAS, 27 setembru 2019 (TATOLI)-Koordenadora Gabinete Ministériu Reforma Lejizlativa no Asuntu Parlamentár (MRLAP), Melisa Silva Caldas, informa, Governu iha ona kompromisu reforma lejizlasaun ka lei Indonézia  ho UNTAET nian hanesan kódigu prosesu penál no seluk tan ne’ebé  maka daudaun ne’e Tribunál sei uza hodi halo  julgamentu maske la kondís ona ho situasaun iha rai laran.

Notísia Relevante : Reforma Lejizlativa, MRLAP Rona Sosiedade Sivíl

Koordenadora Interina ba Reforma Lejizlativa MRLAP, Melisa Silva Caldas. Imajen/Egas Cristovão

“Ba polítika reforma lejizlativa, governu konstitusionál  da-ualu hakarak haree ba lei hotu-hotu ne’ebé daudaun iha ona, hahú husi tempu UNTAET no iha mós  lejizlasaun Indonézia,”  esklarese Melisa Silva Caldas ba TATOLI durante konsulta lei justisa tradisionál no kostumeiru, ohin, iha Alas, Munisípiu Manufahi.

Polítika reforma lejizlasaun ne’e, tuir Koordenadora MRLAP, importante hodi prodús lei sira tuir kondisaun rill povu Timor tanba durante ne’e Timor-Leste   sei komunga lei husi Portugal no nasaun sira seluk hodi fó justisa ba povu. Tanba ne’e, dala barak autór judisiáriu sira aplika   lei iha Tribunál susar tebes, ezemplu  kazu  sivíl barak pendente, tanba ne’e presiza reforma nune’e povu hotu bele asesu justisa ho di’ak iha tribunál no justisa tradisionál.

Iha fulan Janeiru 2019 Governu da-ualu liuhusi reuniaun Konsellu Ministru aprova ona polítika reforma lejizlativa no reforma judisiáriu. Mezmu nune’e Melisa Silva Caldas klarifika katak, desizaun Konsellu Ministru ne’e la’ós  fó podér tomak ba MRLAP atu hadau kna’ar Ministériu Justisa  nian atu prodús lei, maibé sei buka sei koordena hamutuk hodi prepara lei ida kualifikadu.

Jornalista          : Nelson de Sousa

Editór                : Francisco Simões

HAKEREK NO HATÁN

Please enter your comment!
Please enter your name here