Diretór CNC, Hugo Maria Fernandes. Imajen Tatoli/Cipriano Colo

DILI, 27 setembru 2019 (TATOLI) – Durante Komemorasaun Tinan 20 Konsulta Populár (30 agostu 1999-30 agostu 2019), Grupu Solidariedade Internasionál ne’ebé uluk fó apoiu maka’as ba Timor-Leste (TL) ninia independénsia, entrega fotografia kuaze 20 ba Centro Nacional CHEGA! (CNC).

Diretór Ezekutivu CNC, Hugo Maria Fernandes iha nia serbisu fatin esplika katak, fotografia hirak ne’e, maioria kona-ba istória Timor nian iha pasadu, ne’ebé entrega direta hosi antigu veteranu Austarlianu ne’ebé uluk liu hola parte mós iha Grupu Solidariedade Internasionál.

Nia hatutan, antigu veteranu Australianu sira ne’e uluk hanesan mós International Forces for East Timor (INTERFET) no sira entrega fotografia hirak ne’e la liuhusi kooperasaun ofisiál.

“Fotografia sira ne’e entrega direta hosi David Savage, ne’ebé uluk hola parte iha misaun INTERFET ho nia maluk sira seluk. Fotografia hirak ne’e kona-ba situasaun reál populasaun Timor nian iha tempu pasadu, maibé la’ós kona-ba violasaun sira,” Hugo ba Agência Tatoli iha nia kna’ar fatin, Balide, ohin.

Hugo informa, tanba fotografia sira ne’e entrega direta ba CNC, entaun sei prezerva de’it iha CNC.

Nia haktuir, Grupu Solidariedade ne’ebé hanesan mós veteranu Australianu, promete katak sira sei organiza malu iha Austrália atu dijitaliza foto no dokumentu balun ne’ebé hetan iha 1999, no sira iha kompromisu atu entrega hodi prezerva iha CNC.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here