DILI, 27 setembru 2019 (TATOLI) – Vise-Prezidente Autoridade Nasionál Petróleu no Minerál (ANPM) ba Asuntu Esplorasaun no Exploitasaun Minerál, José Gonçalves, informa ANPM seidauk simu pedidu husi kompañia China Harbour atu lori amostra fatuk bá teste.
“Ami seidauk hetan aplikasaun husi kompañia China Harbour, ne’ebé ami labele halo desizaun ruma ba fatuk ne’e atu lori bá teste”, Vise-Prezidente ANPM ba Tatoli iha knaar fatin Faról, ohin.
Iha kuarta ne’e, empreza China Harbour atu lori fatuk ho kilograma 65 liuhosi Aeroportu Nicolau Lobato, atu halo teste iha laboratóriu, maibé parte kuarentena laiha koñesimentu tanba laiha pedidu husi ANPM.
José Gonçalves hatutan, ANPM la hetan pedidu ruma husi China Harbour, ne’ebé autoridade ne’e labele halo pedidu ba alfándega no kuarentena atubele prosesa amostra fatuk ne’e bá teste.
“Karik kompañia China Harbour falla iha prosesu administrativa ruma tanba la’ós dahuluk hasai fatuk, maibé sira hasai kuaze dala barak ona ba amostra, iha dokumentasaun ne’ebé kompletu no ami halo rekomendasaun para autoridade Alfándega no Kuarentena autoriza hasai”, katak.
Tuir prosedimentu atu haruka amostra fatuk ba teste iha rai-li’ur, Vise-Prezidente ANPM dehan kompañia tenke lori bá Institutu Petróleu no Jeolojia (IPG, sigla portugés) verifika hodi rekolla dadus fatuk sira ne’e foti iha ne’ebé, fatuk saida no kuantidade hira.
Hafoin halo pedidu mai ANPM hamutuk ho dokumentu aplikasaun husi kompañia atu halo fali prosesu administrativa ida atu haree kompañia foti iha lisensa ambientál atu foti fatuk no amostra ne’e tuir lisensa ka lae.
“Ami ho IPG servisu hamutuk para kontrola ida ne’e, bainhira tuir ona rekizitu, ami halo pedidu ba Alfándega no Kuarentena foin haruka sira lori bá teste”, dehan nia.
Hatán ANPM halo ona pedidu ba Alfándega, nia dehan : “Ami presiza hatene amostra ida ne’ebé mak ami hala’o pedidu tanba ami kuandu halo rekomendasaun, ami iha dokumentu no gambar hotu katak fatuk saida, todan hira, númeru no kuantidade hira?”, haktenik.
Nia salienta karik iha pedidu bele hatama ba IPG atu verifika hodi mai ANPM fó lisensa atubele lori bá teste tanba presiza duni atu aterra Portu Tibar.
“Ami labele halo buat ida, kuandu laiha aplikasaun husi China Harbour tuir prosedimentu oinsá ita halo rekomendasaun para sira lori bá teste, maibé karik iha ami prontu koopera atubele bá halo teste”, nia sujere.
José Gonçalves dehan empreza tenke kontinua halo teste ba kualidade fatuk hodi aterra ba Portu Tibar no iha lisensiamentu ambientál, maibé atu hasai fatuk ne’e tenke prienxe rekizitu sira.
Asaun Kuarentena ne’e, nia dehan hatudu pasu pozitivu no komprova katak sistema autoridade Estadu nia la’o liuliu laiha rekomendasaun ou karta apropriadu tuir prosesu no lei labele haruka sai.
“Ami komprova ona katak sistema ne’e la’o hela ho di’ak tebes katak kualkér amostra haruka sai no laiha verifikasaun ka rekomendasaun ita labele haruka sai duni”, afirma.
Notísia relevante : Kuarentena Hein Pedidu ANPM fó Lisensa ba China Harbour Lori Fatuk bá Teste
Jornalista : Florencio Miranda Ximenes
Editora : Maria Auxiliadora
