Vise-Prezidente Autoridade Nasionál Petróleu no Minerál (ANPM) ba Asuntu Esplorasaun no Exploitasaun Minerál, José Gonçalves. Foto/Florencio Ximenes.

DILI, 27 setembru 2019 (TATOLI) – Vise-Prezidente Autoridade Nasionál Petróleu no Minerál (ANPM) ba Asuntu Esplorasaun no Exploitasaun Minerál, José Gonçalves, informa hahú iha janeiru to’o 25 setembru tinan ne’e, ANPM konsege rekolla reseita $1.566,010.30 hodi hatama ba  kofre Estadu.

“Agora daudaun ita konsege rekolla ona millaun 1,5-resin, ne’ebé espera katak númeru ida ne’e sei aumenta barak liu iha  31 dezembru tinan ne’e”,  Vise-Prezidente ANPM ba Ajénsia Tatoli iha knaar fatin Faról, ohin.

Retornu ne’e rekolla husi kompañia sira ne’ebé hetan ona lisensa ambientál hodi hala’o atividade pedreira no rai-henek tantu husi kompañia nasionál no internasionál.

Kompañia selu taxa depende ba kualidade materiál ne’ebé sira foti hanesan taxa ba fatuk no rai-henek ketak no depende mós ba sira foti kuantidade.

Nia dehan, ANPM hala’o kalkulasaun ba fatuk no rai-henek ne’ebé kompañia sira foti liuhosi sistema monitorizasaun teknolojia avansadu hanesan uza drone hodi semo no sura kuantidade, hafoin aplika administrasaun ka selu taxa.

“Liuhosi teknolojia drone ne’e mak ita bele kalkula ho akurasia ne’ebé mak di’ak hodi haruka kompañia selu, sira ne’e mak kontribui ba reseita komesa sa’e”, dehan nia.

Entretantu sobre atividade esplorasaun fatuk no rai-henek ho ilegál, nia dehan ANPM deteta fó sansaun tuir kálkulu fatuk no rai-henek ne’ebé sira hasai no sira fa’an tiha ona.

Prosesu selu taxa no multa, nia dehan ANPM fó invoce ba empreza sira bá selu iha Banku Nasionál Ultramarinu (BNU) liuhusi konta Estadu ka konta Ministériu Finansa.

Iha 2019, ANPM fó ona lisensa ambientál ba empreza nasionál no internasionál hamutuk 10.

Tuir dadus reseita ne’ebé Tatoli asesu, iha tinan kotuk (2018), ANPM rekolla reseita hamutuk $1.668,804,2. Bainhira konta reseita hahú husi 2006 to’o 25 setembru 2019 hamutuk $5,328,500, 36.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here