Primeiru-Ministru, Taur Matan Ruak. Imajen Tatoli/Cipriano Colo

DILI, 26 setembru 2019 (TATOLI) – Xefe Governu, Taur Matan Ruak, elojia servisu Polísia Nasionál Timor-Leste (PNTL) ne’ebé halo atuasaun lalais ba akontesimentu iha Ai-mutin, Comoro, Dili, foin lalais ne’e.

“Ha’u elojia servisu PNTL ne’ebé halo atuasaun lalais ba iha akontesimentu iha momentu ne’ebá, hodi ultrapasa no rezolve tiha problema ne’e, iha ne’ebé la hada’et ba fatin seluk”, Taur elojia.

Sentimentu elojia ne’e, Taur espresa hafoin enkontru semanál ho Prezidente Repúblika, Francisco Guterres Lú Olo, iha Palásiu Prezidente  Nicolau Lobato, Bairru Pité, ohin.

Lee mós: Polísia Detein Ona Suspeitu Na’in Rua Ba Kazu Konfrontu Ai-mutin

Taur hateten, akontesimentu ne’e nu’udar kazu krime ida maibé situasaun kontroladu kedas iha tempu ne’ebá, no ohin Xefe Governu aprezenta mós ba Xefe Estadu.

Nia hatutan, hafoin akontesimentu, Polísia halo servisu di’ak tebes no lalais, hodi normaliza hikas situasaun no ema kontinua hala’o atividade hanesan baibain.

Taur konsidera situasaun ne’e hanesan lisaun importante ba sidadaun hotu, atu bele loke matan hodi evita no labele akontese tan iha futuru.

Maski nune’e, Xefe Governu mós lamenta ho asaun oho sidadaun no hein katak situasaun ne’e labele akontese tan iha futuru.

“Husu ba joven sira atu labele provoka malu. Tenke respeita malu. Tanba, vida ida ne’ebé lakon ita lakohi akontese tan iha futuru. Ida ne’e ha’u lamenta teb-tebes”, Taur lamenta.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here