Edifisiu Tribunál Distritál Dili. Imajen/TATOLI

DILI, 26 setembru 2019 (TATOLI) – Tribunál Distritál Dili (TDD), ohin hamonu pena komarka tinan ida, suspende tinan ida ba Diretora Rekursu Umanu Konsellu Imprensa, arguida Ligia Viera Amaral  ho Diretora Ezekutiva KI, arguida Ana Teresa Siqueira, pena prizaun tinan ida, suspende tinan rua.

Juis Yudi Pamukas mós aplika kustu judisiáriu ba arguida nain rua ho montante $100.00. Razaun tribunál aplika pena suspensa ne’ebé diferente tanba arguida Ligia Viera Amaral la deside buat ruma, maibé kumpre de’it saida mak arguida Ana Tereza Siqueira aprova.

Diretora KI na’in rua nu’udar arguida, konversa hela ho sira-nia advogada iha Tribunál Distritál Dili. Dokumentasaun Tatoli/ Domingos Piedade Freitas

Nune’e, tribunál absolve arguida sira husi krime abuzu poder, artigu da-297; funsionáriu ne’ebé abuza podér ka sakar devér sira ka’it ho nia funsaun ho intensaun atu hetan ba nia án ka ba terseiru, benefísiu ilejítimu ka halakon ema seluk, sei kondena ho pena prizaun husi tinan 1 to’o 4, enkuantu pena grave liu la hatún tanba forsa husi dispozisaun legál seluk.

Artigu da-296; (hadau sasán hodi uza ba nia án rasik), funsionáriu ne’ebé mak uza ka fó-fatin katak ema seluk halo ba finalidade seluk sira ne’ebé mak destina husi karreta ka husi sasán movel seluk ho valór signifikativu atu hetan ba nia án ka ba terseiru benefísiu ilejítimu ka halakon ema ruma, sei kondena ho pena prizaun to’o tinan 2, enkuantu sasán hirak ne’e hetan iha nia liman ka sai asesivel ba nia tanba razaun husi nia funsaun sira.

Arguida Ana Tereza Siqueira, tribunál deside pena suspensa tinan rua tanba faktu provadu arguida asina dunik pedidu autorizasaun utilizasaun kareta Estadu ba arguida Ligia Viera Amaral ba Kupaun-Indonézia maske momentu ne’eba Direktór Interinu la aprova.

Audénsia julgamentu prezide husi juiz singulár Yudi Pamukas,  Ministériu Públiku reprezenta husi Prokuradór Adérito Tilman, no arguida sira hetan asisténsia legál husi Advogada Privada, Cesaltina dos Santos.

Jornalista: Domingos Piedade Freitas

Editora: Rita Almeida

HAKEREK NO HATÁN

Please enter your comment!
Please enter your name here