Primeiru-Ministru, Taur Matan Ruak. Imajen/TATOLI

DILI, 26 setembru 2019 (TATOLI) – Primeiru-Ministru (PM), Taur Matan Ruak, husu povu atu pasiénsia nafatin hodi hein mambru Governu ne’ebé seidauk simu pose.

Taur husu ne’e relasiona ho ezijénsia povu nian ba membru Governu ne’ebé seidauk simu pose, no Primeiru-Ministru rasik sei halo esforsu másimu ba kestaun ne’e.

Xefe Governu hakarak informa nafatin ba povu katak solusaun hotu-hotu posível no hein tempu.

Lee mós: PM Garante Loron Ida Sei Solusiona Kandidatu Membru Governu Pendente

Nia mós rekoñese katak, naturálmente, hanesan Primeiru-Ministru preokupa maka’as ho situasaun ne’e. Nia halo komparasaun katak, hanesan ba joga bola, bainhira ekipa la kompletu ne’e susar hatama golu.

Nia hakarak informa mós kona-ba novidade katak preokupasaun ida ne’e Primeiru-Ministru sempre levanta ba Prezidente Repúblika atu haree no saida mak atu bele halo tan.

“Husi ha’u-nia parte ha’u halo esforsu”, Taur subliña. Esperansa boot hosi Primeiru-Ministru mak ho kualker esforsu ne’ebé iha, membru Governu na’in-9 pendente sei simu pose hodi haforsa liután governasaun Oitavu Governu Konstitusionál.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here