Kontra-atake entre jogadór SLB no Assalam. Imajen Mídia LFA

DILI, 26 setembru 2019 (TATOLI) –  AD SLB Laulara hamonu Assalam FC  ho golu 3-1 iha jogu jornada 14, jornada ikus Primeira Divizaun Liga Futeból Amadora (LFA) époka 2019, ne’ebé hala’o iha Estádiu Munisipál Dili, kinta ne’e.

Golu vitória SLB prodúz hosi jogadór Mouzinho de Lima iha minutu 44, 62 no Andra Firdaus 72. Enkuantu, golu úniku Assalam hatama hosi Daniel Adadi iha minutu 26.

Maski ekipa ne’ebé koñesidu ho Makikit Laulara gaña vitória hosi Armada Assalam maibé hanesan kompleta de’it jogu LFA époka ne’e no hadau tuur nafatin iha zona seguru iha tabela klasifikasaun basá ekipa ne’ebé atu kampiaun mak Boavista FC Timor ho Lalenok United FC tanba pontu besik malu.

Fó hanoin hikas katak ekipa ne’ebé dezpromovidu ona ba Segunda Divizaun mak Atlético Ultramar no Académica FC tanba pontu ki’ik liu kompara ho klube neen seluk hosi jogu dala sanulu resin-haat.

Enkuantu, klube Segunda Divizaun rua ne’ebé promovidu ona ba Primeira Divizaun hodi troka Ultramar no Académica nia fatin mak Aitana FC no DIT FC.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here