Sekretáriu Estadu Formasaun Profisionál no Empregu, Julião da Silva. Imajen/Tatoli.

DILI, 26 Setembru 2019 (TATOLI)-Sekretáriu Estadu Formasaun Profisionál no Empregu (SEFOPE), Julião da Silva, sujere foinsa´e sira atu partisipa iha formasaun profisionál sira hodi bele kompete ho ema seluk.

“Favór ida ajuda governu, ajuda estadu no ajuda ita-nia nasaun liuhusi buat ida de’it, hakbesik aan hodi ba tuir formasaun. Formasaun importante tebes, se ita lakohi tuir formasaun ita lalika mehi atu kompete ho ema seluk,” Sekretáriu Estadu, Julião da Silva, iha nia diskursu, iha ámbitu lansamentu ezpozisaun ba loron mundiál turizmu, iha Sentru Konvensaun Dili (CCD-sigla portugés), ohin.

Governante ne´e mós sujere ba timoroan sira tuir formasaun hodi aumenta kapasidade oinsá atende ema iha kualker fatin.

Enkuantu, Diretór Jerál Turizmu Ministériu Turizmu Komersiu Indústria (MTKI), José Filipe Dias Quintas, iha biban ne´e, hateten  Setór turizmu ne’e, setór ida sai hanesan dalan ba setór seluk.

“Ita ko´alia kona-ba setór turizmu, ita ko´alia kona mós ba ai-han, ospitalidade. Tanba ne’e, ita bele dehan katak setór turizmu kontribui ba despeza, ezemplu iha illa Ataúro, agora kampu serbisu bo’ot liu iha ne’ebá maka turizmu. Ha´u vizita iha ne’ebá ha´u halo konkluzaun ida katak ema hotu iha ne’ebá serbisu iha área turizmu”.

Relasiona ho atividade turizmu nian ne’ebé hala´o hodi komemora loron mundiál turizmu, diretór ne’e husu atu joven sira utiliza didi´ak oportunidade hodi buka hatene buat ruma hodi asesu ba kampu serbisu iha setór turizmu nian.

Iha okaziaun ne´e, Diretór MTKI José Filipe Dias Quintas fó hanoin mós ba foinsa´e sira liuliu mane atu muda mentalidade. “Ezemplu iha Timór ema serbisu iha área turizmu hanesan kuziñeiru ne’e ema dehan ne’e feto nian maibé la’ós feto de’it maka bele sai  xefe, mane mós bele. Tanba ne’e, joven sira tenke muda mentalidade ida ne’e”.

Nia fó hanoin tan katak setór turizmu iha Timór, se ita maka la okupa fatin, ema li´ur mak sei mai okupa. “Tanba ne´e, ho ida ne’e bele enkoraja alin joven sira katak imi tenke envolve iha setór turizmu katak imi mós bele, nune’e liu husi kooperasaun ita mós kontinua uza oportunidade ne’e ho di’ak atu kontinua dudu setór ne’e ba oin,” tenik Diretór José Filipe Dias Quintas.

Entretantu, komemorasaun loron mundiál turizmu ne´e realiza husi USAID no parseria ho SEFOPE no MTKI.

Notísia relevante:Governu Prevee Orsamentu Rihun $11 Selebra Loron Mundiál Turizmu

Jornalista:Nelia Borges

Editór      : Rafy Belo

HAKEREK NO HATÁN

Please enter your comment!
Please enter your name here