Veterana Kasian. Foto TATOLI: Tomé Amado

LIQUIÇA, 26 setembru 2019 (TATOLI)-Obra ba konstrusaun terminál Tasitolu atinje ona 80% maibé la uza tanba orientasaun husi Primeiru-Ministru Taur Matan Ruak hodi kansela ho razaun katak fatin refere konsidera nu´udar zona protezida no sítiu turístiku, tanba tuir planu governu iha hanoin atu halo prezervasaun.

Obra ba konstrusaun Tasitolu ne´e mai husi Konsellu Administrasaun Fundu Infraestrutura ho montante inisiál $346.340,27 no pagamentu obra ne´e hela de´it dolár rihun 200. Obra ne´e hahú iha 2014.

Veterana Madalena Bidau Soares “Kasian” hateten, se orsamentu ne´e mak iha nia liman, sei aumenta tan estabelesimentu ensinu hanesan jardin infantil no seluk tan kompleta ho nia fasilidade sira.

“Osan ne’e mak fó mai ha’u, ha’u garante katak eskola sira iha Liquiça sei barak liután ho ninia fasilidade ida adekuadu,” hateten Veterana Kasian ba Ajénsia TATOLI iha nia hela fatin, Suku Mota-Ki’ik, Munisípiu Liquiça, kinta (26/09/2019).

Veterana ne´e haktuir katak eskola infánsia lima ne´ebé nia harii, tolu sei iha hela faze konstrusaun. Maske nune´e, profesór sira aselera ona atividade letiva sira. Profesór sira kumprende kondisaun ne´ebé mak iha.

“Ha’u la selu saláriu hanesan governu selu ba profesór sira, ha’u dehan ba profesór sira ,ha’u laiha osan atu selu imi maibé ha’u sei fó ba imi tuir ha’u-nia kapasidade”.

“Entaun profesór na’in neen, ne’ebé hanoin kuandu iha, ema ida bele hetan 25 dolár. Maibé, kuandu laiha bele hetan de’it 10 ou 15 dolár. Sira la reklama to’o agora tanba sira hatene kondisaun no situasaun ne’ebé iha,” hateten Veterana Kasian.

Nia informa, osan ne´ebé nia uza hodi selu profesór sira ne´ebé hanorin iha eskola ne´ebé nia harii mai husi negósiu ki´ik balun ne´ebé nia halo no osan veteranu iha ona mak uza fali osan sira ne´e hodi selu profesór sira.

Tanba ne´e, dala ida tan, tuir Veterana Madalena Bidau Soares, osan ne´ebé uza hodi halo terminál iha Tasitolu, depois kansela fali husi Primeru-Ministru tanba konsidera nu´udar zona protezida no sítiu turístiku, ba nia prioridade boot liu mak sei aumenta tan fasilidade eskola iha Munisípiu Liquiça.

“Ha´u harii ona eskola Infantil lima iha Liquiça ho osan veteranu nian inklui mós apoiu husi doadór balun, eskola rua hetan ona rekoñesimentu, falta tan eskola tolu mak sei iha faze konstrusaun”.

Veterana ne´e konfirma, ba jerasaun foun sira-nia futuru, nia nunka tuur hakmatek. Nune´e Veterana Kasian kompromete katak hakarak harii tan biblioteka ho fasilidade kompletu. Kada eskola hotu iha Liquiça tenke kompleta husi ensinu báziku to’o ensinu sekundáriu inklui loke tan sentru formasaun atu estudante sira bele kapasita aan di´ak liután.

Tanba eskola Infantil lima ne’ebe harii daudaun ne’e sei presiza tan fasilidade ida adekuadu. “Eskola sira ne’e iha sala aula rua de’it maibé ninia rezultadu, estudante barak mak konrinua ona ba ensinu báziku no sekundáriu”.

“Se osan rihun 100 fakar ona laiha rezultadu ne’e mak fó mai ha’u, ha’u garante katak eskola sira iha Liquiça sei barak liután ho ninia fasilidade ida adekuadu,” nia insiste.

Veterana Madalena Bidau Soares “Kasian” dehan, nia envolve aan iha dezenvolvimentu edukasaun ne´e tanba hakarak dudu jerasaum foun sira atu kompete. “Tanba husi edukasaun mak sei forma ema sai ema hodi kontinua lori nasaun ne’e ba futuru oin mai,” nia konsidera.

Iha fatin ketak, Fundadora no Diretora Klínika PAS (Prontu Atu Serbi), Maria Dias hateten, osan ne´ebé governu aloka hodi konstrui terminál Tasitolu, depois xefe governu kansela tanba nu´udar zona protezida no sítiu turístiku no tanba tuir planu governu iha hanoin atu halo prezervasaun.

Diretora Klínika Privada PAS, Maria Dia. Foto TATOLI: Nelia Fernandes

Karik osan ne´e mak iha nia liman mak sei oferese hodi fasilita formasaun área espesialidade ba médiku timoroan sira no hola ekipamentu saúde nian hodi tratamentu saúde.

“Ha’u dedika ba parte saúde nian, karik osan ne’e sira aloka didi’ak ba parte saúde, parte saúde iha buat barak, ha’u bele haree mós iha liu formasaun ba médiku jerál sira, ba espesialista, tanba ita Timór ne’e iha moras oioin, ne’ebé presiza espesialista. Ita-nia espesialista agora daudaun sei mai husi rai li´ur, maioria mai husi Cuba,” hateten Diretora Maria Dias ba Ajénsia TATOLI iha nia kna´ar fatin, Becora, sesta (27/09/2019).

Diretora Maria Dias hateten, se ita gasta osan ne’e, ita haruka sira ba estuda para foti espesialidade internista, ba kardiolojia ka ba moras sira ne’ebé komún liu iha Timór, entaun haruka osan ne’e mais de rihun 15 dólar. “Se haruka sira ne’e mak ba forma sira ou tanba medikus barak husi Timór agora ne’e, cetak (prodús) ona mil médiku.

Fundadora PAS ne’e reforsa, se ita ne’e mak aloka osan didi’ak, iha planu didi’ak, aloka osan ne’e ba haruka médiku sira forma sira, para sai espesialista. Bele mós forma iha Timór tanba ita iha ne’e moras mós barak liu no ita loke iha UNTL, oinsá fali governu bele kria osan ida ne’e ita bele loke fali espesialidade ruma iha Timór. Ne’e ita rekruta de’it mak profesór sira mai husi li´ur no médiku jerál sira ne’e bele halo sira-nia espesialidade balun iha ne’e.

Nia hatutan, iha rai seluk ita atu halo prátika ho moras ruma, ita tenke selu maka´as. “Agora Timór lae, hakarak prátika, pasiente barak, la presiza haruka tenke selu pasiente sira ka tenke gasta osan barak liu. Ne’ebé, osan ida daudaun ne’e mais atus tolu resin, mak agora hanesan ne’e mal gastu de’it,” konsidera Diretora Maria Dias.

Alende ida, tuir Diretora Maria Dias, orsamentu ne´ebé alende oferese oportunidade ba médiku sira hodi hasai espesialidade, bele mós uza hodi kompleta ekipamentu saúde nian.

Kona-ba Klínika PAS, nia haktuir katak nia jere tuir kbiit ne´ebé mak iha. “Ha’u sente oras ne’e ho kapasidade ne’ebé ami iha ne’e, buat hotu ne’ebé ami iha ne’e. la’o hela,” dehan Diretora Maria Dias.

Kona-ba orsamentu ida ne’ebe mak aloka ba halo konstrusaun Terminál Tasitolu ne’e, polítiku sira-nia planu ne’e ladun pas. Planu ida ne’ebé didi’ak ne´e hamutuk, integradu husi ministériu hotu, integradu atu halo desizaun loloos hodi halo projetu ruma.

Notísia relevante:Terminál Tasitolu Kanseladu Tanba Konstrui iha Sítiu Istóriku

Jornalista : Tomé Amado/Nelia Fernandes
Editór        : Rafy Belo

HAKEREK NO HATÁN

Please enter your comment!
Please enter your name here