Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 26 setembru 2019 (TATOLI) – Prezidente Parlamentu Nasionál (PPN), Arão Noé de Jesus da Costa Amaral louva ho servisu Cruz Vermelha Timor-Leste, (CVTL) ne’ebé barak liu hala’o atividade iha área remota.

“Ohin Prezidente Cruz Vermelha Timor-Leste ho ninia ekipa hasoru malu ho ha’u informa kona-ba sira nia atividade servisu ne’ebé durante ne’e la’o kapas tebes hanesan dada bee ba komunidade no halo uma ba kbiit laek sira liliu iha Atauru no Oé-Cusse. Ha’u apresia tebes ho sira nia servisu”, tenik PPN iha resintu Parlamentu Nasionál (PN), kinta ne’e.

Nia dehan, maneira servisu CVTL nian di’ak tebes tanba bele eduka mós komunidade sira hodi bele kontribui ba dezenvolvimentu nasaun nian.

“Parlamentu fó apoiu pursentu 100 ba atividade hotu Cruz Vermelha nian”, nia akresenta.

Arão Noé haktuir, iha enkontru ne’e CVTL husu ba PN atu haree iha Orsamentu Jeral Estadu (OJE) 2020 bele inklui mós subsídiu ida nune’e bele intensifika programa hotu ne’ebé iha.

“Sira husu tanba durante ne’e sira garante de’it orsamentu hosi doadór sira no husu mós kontribuisaun hosi komunidade. Tanba ne’e sira presiza apoiu ida”, nia subliña.

PPN hatutan: “Tinan hirak liubá sira hetan apoiu uitoan hosi Gabineti Sosiedade Sivíl hamutuk $250.000 resin ho nune’e sira husu atu tinan ne’e bele aumenta uitoan nune’e bele aselera di’ak liu tan programa sira”.

Alende ne’e, nia husu ba CVTL atu hakbesik nafatin ba ba populasaun iha área remota no rurál ne’ebé nunka hetan asisténsia.

Jornalista: Horteçio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here