Ministru Reforma Lejizlativa no Asuntu Parlamentár, Fidelis Manuel Leite Magalhães. Imajen/Egas Cristóvão

DILI, 26 setembru 2019 (TATOLI) – Ministru Koordenadór Asuntu Ekonómiku (MKAE) interinu, Fidelis Manuel Leite Magalhães, hatete Governu sei foka ba área tolu hanesan setór turizmu, indústria no komérsiu ho objetivu atu diversifika ekonomia iha Timor-Leste.

“Tinan oin, liu-liu MKAE sei foka ba setór tolu. Ida ne’e maka ami-nia prioridade tanba setór tolu bele fó reseita di’ak ba nasaun. Tanba iha merkadu globál bele hetan retornu triliaun $1.5, iha Ázia de’it ita bele hetan millaun $15”, Fidelis afirma hafoin halo lansamentu rezultadu relatóriu husi Organizasaun Naun Governamentál Oxfam ne’ebé halo peskiza ba diversifikasaun ekonomia Timor-Leste nian iha Salaun João Paulo II Komoro, ohin.

Tanba ne’e Governu komesa hadi’a sítiu turístiku balun, nune’e bele halo investimentu iha setór ne’e, tanba iha Ázia daudaun ne’e, turista sira hakarak destinasaun turístika foun.

Atuál Ministru Reforma Lejizlativa no Asuntu Parlamentár dehan iha setór indústria iha konjuntura polítika komersiál tempu ne’e pas kedan ba Timor-Leste hodi bele avansa ba indústria ida ne’ebé asesu ba merkadu. Tanba nasaun ne’e hanesan país sub-dezenvolvidu ida, iha asesu ba merkadu sira.

Tanba ne’e maka konjuntura polítika mundiál ba indústria nian pas ba iha Timor-Leste hodi avansa.

Nia dehan kuandu setór rua hanesan turizmu no indústria la’o ona maka Governu foka ba fali iha komérsiu oinsá maka atu fa’an produtu sira iha rai-laran ba li’ur.

Kona-ba setór agrikultura iha Timor-Leste, Ministru Fidelis hatete maioria populasaun ho vida agrikultór, maibé parte ne’e sei enfrenta dezafiu.

“Tanba ita-nia populasaun maioria joven no barak husi joven ne’e hakarak imigra mai sentru sidade, hodi husik tiha setór ida ne’e. Tanba ne’e maka Governu muda pozisaun hodi konsentra ba iha setór tolu importante, turizmu, indústria no komérsiu, atu dudu ida ne’e hodi diversifika nune’e bele absorve ema hotu iha setór tolu ne’e”, tenik Fidelis.

Nia salienta liután foin-sa’e Timor-Leste ne’e maioria hakarak empregu formál duke agrikultura, tanba ne’e Governu iha tinan oin fó prioridade ba  área tolu ne’e.

“Ita la’ós nega setór agrikultura, ita kontinua fó prioridade no investe iha agrikultura, maibé foin-sa’e hotu iha mundu ne’e hanesan sira lakohi laborál ida ne’ebé nia la hetan osan fiksu fulan-fulan. Maibé ita sei investe nafatin iha agrikultura, ita mós fó importánsia ba iha setór produtivu seluk nune’e bele fó retornu ba ekonomia Timor-Leste”, katak.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here