AINARO, 25 setembru 2019 (TATOLI)-Liuhusi Konferénsia Munisipál Veteranu Munisípiu Ainaro ne’ebé hala’o durante loron rua hahú 24-25 setembru 2019, hili ona Julio da Conceição ‘Loro Mesak’ ba Prezidente Konsellu Veteranu Ainaro periodu 2019-2023.
Konferensista sira aprezenta pakote rua, pakote A maka Julio da Conceição ‘Loro Mesak’ no pakote B maka Veteranu Ventura Labok, maibé pakote B la prienxe kritéria tanba ho de’it apoiante ema 14 tanba tuir regulamentu tenke ho apoiante ema 50.
Ho nune’e pakote A maka avansa ba eleisaun ho votu afavór 230, nulu ualu, branku ida no la vota ida.
Prezidente Eleitu, Julio da Conceição ‘Loro Messak’ hatete, prontu atu serbisu no koopera ho veteranu Munisípiu Ainaro, ho prioridade mak ne’e sei tau atensaun ba feto faluk no oan ki’ak no mós sei tau atensaun ba tratamentu saúde veteranu sira.
Komisaun Instaladora Munisipál realiza konferénsia refere hodi hili Prezidente eleitu bazeia ba artigu 35 dekretu númeru 7/2018.
Veteranu hamutuk na’in 240 mak partisipa iha konferénsia ne’e, ne’ebé maihusi Postu Administrativu Ainaro Villa, Maubesi, Hatu-udu no Hatu-Builico. Tuir dadus Munisípiu Ainaru iha Veteranu hamutuk 2.393.
Jornalista : Nelson de Sousa
Editór : Francisco Simões
