Kristu Luirai. Imajen/ Turizmu Timor-Leste

DILI, 26 setembru 2019 (TATOLI) – Governu liuhosi Ministériu Turizmu, Komérsiu no Indústria (MTKI) ladauk aplika retribuisaun (selu) ba turista sira kuandu vizita fatin turístiku tanba presiza iha dekretu lei no diploma ministeriál inklui kondisaun infraestrutura no atendimentu ne’ebé seidauk preparadu.

“Hanesan Kristu Rei, ema hotu kestiona katak loloos ema bá vizita ne’ebá selu ona, Governu liuhosi Ministériu Turizmu, Komérsiu no Indústria haree ona, maibé ita kuandu aplika ida ne’e, ita tenke presiza lei, hanesan dekretu lei no diploma ministeriál”, Diretór Jerál Turizmu, José Dias Filipe Quintas ba Ajénsia Tatoli, ohin, iha Sentru Konvensaun Dili (CCD, sigla portugés).

Maibé molok lei ne’e iha, Governu presiza haree uluk infraestrutura bázika sira hanesan sintina, parajen ba veíkulu, jestaun di’ak no seluk tan, atu ema kuandu vizita área turístika sente seguru no konfortavel, nune’e ema selu mós sente satisfás.

“Ezemplu hanesan iha Marobo ne’ebá, ha’u selu maibé sintina oinsá, karreta ha’u para ne’e oinsá? Tanba ne’e fasilidade tenke iha atu ema bá ne’e merese duni atu selu”, haktenik.

Entretantu problema infraestrutura, la’ós hakfodak halo, maibé presiza planu no jestaun ida di’ak atu ema labele estraga fatin turístiku.

Entantu Governu estabelese ona komisaun interministeriál ba dezenvolvimentu turizmu nian, komisaun sei diskute lei katak lei ne’e diploma ministeriál ka dekretu lei ida própriu ba retribuisaun (Ha’u tama, ha’u selu).

Jornalista : Zezito Silva                        

Editora : Maria Auxiliadora

HAKEREK NO HATÁN

Please enter your comment!
Please enter your name here