Sekretáriu Estadu Formasaun Profisionál no Empregu, Julião da Silva. Imajen/Tatoli.

DILI, 26 setembru 2019 (TATOLI) – Sekretáriu Estadu Formasaun Profisionál no Empregu (SEFOPE), Julião da Silva, hatete iha tempu badak Governu liuhosi Ministru Koordenadór Asuntu Ekonómiku (MKAE) kria ekipa ida hodi peskiza no foti dadus ba timoroan sira ne’ebé hetan ona servisu iha mandatu Oitavu Governu Konstitusionál nian.

“Ami diskute ona ho Ministru Koordenadór Asuntu Ekonómiku, Fidelis Manuel Leite Magalhães, atu iha tempu badak ami estabelese ekipa ida atu halo peskiza hodi rekolla informasaun hahú Oitavu Governu nia mandatu to’o agora ne’e timoroan hira maka hetan empregu”, SEFOPE, Julião da Silva, informa iha Sentru Konvensaun Dili, Ohin.

Polítika Governu foti dadus ba timoroan ne’ebé hetan ona empregu atubele hatene iha mandatu Oitavu Governu ne’e emprega ona timoroan hira no bá oin esforsu atu rezolve dezempregu iha Timor-Leste.

“Ha’u hanoin polítika Governu nian fó empregu ba timoroan kada tinan 60.000 ne’e ami halo kalkulasaun no estimasaun ne’ebé ami sei hametin servisu integradu atubele atinje mehi ne’e”, katak Julião.

Julião da Silva friza katak hahú mandatu Oitavu Governu iha 2018 to’o agora SEFOPE emprega ona joven kuaze rihun haat.

“Iha tinan 2018 to’o agora SEFOPE nia rejista timoroan 3.000 to’o 4.000 mak hetan empregu liuliu bá Korea Súl no Austrália inklui balun hetan formasaun iha sentru formasaun sira ne’ebé Governu prepara hodi hetan servisu”, dehan.

SEFOPE mós iha programa auto empregu iha tinan oin (2020) prevee osan iha fundu kapitál dezenvolvimentu umanu millaun $4 atu konstrui sentru formasaun sira atu kontinua kapasita timoroan sira atubele kompete iha merkadu traballu.

Julião da Silva dehan iha tinan oin prevee osan iha fundu infrastrutura nian millaun $15 atu estabelese sentru formasaun ne’ebé exelente iha Asosiasaun Nasaun Sudeste Aziátiku (ASEAN, sigla portugés) hodi akumula joven sira tuir formasaun iha área temátika saida de’it hanesan ospitalidade, kanalizasaun bee, instalasaun eletrisidade, karpinteiru, konstrusaun no seluk tan ne’ebé kompleta mós ho fatin prátika.

“Ita husu nafatin ba joven sira atu hakbesik aan ba setru formasaun sira ne’ebé ita kria ona atu hasa’e kapasidade no abilidade kompete iha merkadu traballu’, nia sujere.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here