Ministru Interiór Interinu, Filomeno da Paixão de Jesus. Imajen António Goncalves

DILI, 26 Setembru 2019 (TATOLI) – Governu  liuhusi Ministériu Interiór no Komandu Polísia Nasionál Timor-Leste (PNTL), ohin hamutuk ho ekipa kontinua halo diskusaun ho komandante unidade hotu hodi junta hanoin atu revee lejizlasaun sira iha PNTL.

“Ami diskute prioridade sira ne’ebé VIII Governu hakarak ba polísia, bolu malu hodi fó hanoin ba malu kona-ba lejizlasaun sira iha polísia kona-ba dixiplina, irarkia, estatutu PNTL no prosidimentu seluk ne’ebé bele halo ita nia polísia sai di’ak liután”,  dehan Ministru Filomeno ba jornalista iha Komandu Jerál PNTL Kaikoli, ohin.

Ministru dehan rezultadu diskusaun sei aprezenta liuhosi relatóriu finál ba governu iha fulan-oin. Tanba, asuntu prioridade tolu ne’ebé presiza hadi’a mak fó valór ba progresu dezenvolvimentu komandu tuir Planu Estratejiku Dezenvolvimentu Nasionál (PEDN) 2011 – 2030 hodi lori PNTL hakbesik liuba komunidade hodi garante dame no estabilidade iha rai-laran no rai-liur.

Prosesu estudu halo ona husi peritu Ministériu Interiór no asesór sira iha PNTL, foku ba hadi’a lei organika komandu PNTL, estatatu no regulamentu dixiplinár.

Ba 2020, Governu hakarak Komandu PNTL ezekuta polísia komunitária no polísia rodaviária maka barak liu hodi hakbesik án ba povu hodi minimiza konflitu sira.

Governu mós husu atu Komandu PNTL adia rekrutamentu membru antes foku ba programa prioridade PNTL nian iha 2020.

Nia akresenta, PEDN temi polísia komunitária ne’e karakter militár ne’e dixiplina, polítika ne’e mak tenke hadi’a, polísia la’o fali ba nia dalan, la’ós atu sobu unidade, maibé hadi’a unidade.

Jornalista: Eugénio Pereira

Editora: Rita Almeida

HAKEREK NO HATÁN

Please enter your comment!
Please enter your name here