Detidu sira ba aprezenta iha Tribunal Distritál Dili. Imajen/TATOLI

DILI, 25 setembru 2019 (TATOLI) – Arguido CG kala tenke fila-fali ba otél prodeo tanba komete fali krime foun, hafoin fulan balu nia hetan liberdade kondisionál.

Liu husi julgamentu iha Tribunal Distritál Dili (TDD), ohin, prokuradór Matias Soares, reprezenta Ministériu Públiku alega arguido CG alega tinan hat prizaun efetiva ba krime arma branka hanesan mós ho alegasaun ne’ebé antes ne’e lori nia ba toba iha otél prodeo, Bocora, Dili.

Ministériu Públiku dehan, arguido mós foin hetan liberdade kondisionál detidu ba krime arma branka, omisídiu grave no krime roubo (na’ok). Tanba ne’e, Ministériu Públiku laiha duvida solista ba tribunal atu aplika pena prizaun tinan hat efetivamente.

“Antes arguido iha ona krime hanesan, aleinde ne’e nia mós foin hetan liberdade kondisionál ba krime rua ida omisídiu grave no seluk krime robu, tanba ne’e husu tribunal atu aplika pena prizaun tinan hat efetivamente,” hateten Prokuradór Matias Soares.

Parte defeza husu tribunal atu aplika pena adekuadu tuir tribunal nia entendimentu ba prosesu ne’e, tanba haree ba arguido nia hahalok arrependimentu.

“Parte defeza laiha komentáriu kona-ba prosesu ne’e maski antes arguido komete krime barak, parte defeza haree liu ba arguido nia arrependimentu, tanba ne’e husu atu tribunal aplika pena adekuadu tuir tribunal nia analiza prosesu,” advogadu Marito Soares rekomenda.

Seluk kona-ba akuzasaun ba prosesu krime arma Branka ne’e, hatete iha loron 15 Marsu 2019, tuku 11:15, iha Area Fatu-hada, Kampu Alor, arguido ho motor marka Beet kór matak para hela, iha momentu ne’e parte Polisia seguransa sira halo hela servisu patrullamentu no bainhira pasa revista hetan katana kro’at ida, ne’ebé sikat hela iha arguido nia motor sorin parte karuk.

Iha kalan ne’e kedas arguido hetan detensaun husi polisia sira durante oras 72 nia laran iha sela,  tanba ne’e Ministériu Públiku akuza arguido ho krime Arma Branka ne’ebé hatuur iha artigu 20 hosi lei númeru 5/2017.

Audiénsia julgamentu nee prezide husi Juis, Afonso Carmona, Antonio Fonseca, akompaña mós ho juis estajiáriu, parte prokuradór, Matias Soares, no arguido hetan asisténsia legal hosi advogadu privadu, Marito Soares.

Jornalista : Domingos Piedade Freitas

Editór         : Francisco Simões

HAKEREK NO HATÁN

Please enter your comment!
Please enter your name here