Ministru Reforma Lejizlativa no Asuntu Parlamentár, Fidelis Manuel Leite Magalhães. Imajen/Egas Cristovão.

DILI, 26 setembru 2019 (TATOLI) – Ministru Reforma Lejizlativa no Asuntu Parlamentár no Ministru Koordenadór Asuntu Ekonómiku (MKAE) interinu, Fidelis Manuel Leite Magalhães, dehan estatutu ba rai daudaun ne’e sai problema iha Timor-Leste (TL) no sai hanesan obstákulu ida hodi dada investidór sira atu investe.

Tanba ne’e Governu sei rezolve kestaun refere iha tempu badak, nune’e bele fó serteza ba ema sira kona-ba estatutu rai iha Timor-Leste.

“Lei rai ne’e importante ita atu atribui iha tempu badak, katak lei rai ne’e ita iha tiha ona, maibé lei oan sira ne’ebé atu regula lei rai ne’e ita seidauk finaliza. Tanba ne’e maka ha’u husu ita hein”, dehan Fidelis hafoin halo lansamentu ba rezultadu peskiza ba área diversifikasaun ekonomia Timor-Leste nian husi Organizasaun Naun Governamentál (ONG) Oxfam iha salaun João Paulo II Komoro, ohin.

Nia parte husu ona ba Ministru Justisa (MJ) atu esforsu ba kestaun ne’e hodi bele rezolve lalais. “Hau husu Ministru Justisa ne’ebé maka hanesan na’in ba iha prosesu lei rai nian ne’e no dudu ona prosesu ne’e ba ha’u hodi halo diskusaun, no iha ne’e ita espera katak bele rezolve lalais, nune’e bele fó klareza ba públiku”, dehan governante ne’e.

Kuandu rezolve ona prosesu ne’e maka sei fó serteza duni ba povu tomak katak rai ne’e sé nian, rai ne’e ninia ektare hira.

“Ita presiza rezolve problema ne’e para ema mós iha klareza ida nia bele halo investimentu iha área agrikultura, turizmu, indústria no ekonómiku sira seluk bele la’o di’ak”, dehan Ministru Fidelis.

Rai Ektare Rihun 70 Abandonadu

Ministru Reforma Lejizlativa no Asuntu Parlamentár, Fidelis Manuel Leite Magalhães, akompaña husi Embaixadór Austrália iha Timor Leste, Peter Roberts, no Jerente Programa ONG OXFAM, Fernando da Costa ,hatudu hela relatóriu bainhira halo lansamentu ba relatóriu sobre diversifikasaun ekonomia Timor- Leste. Imajen/Natalino Costa.

Iha fatin hanesan, Jerente Programa Oxfam Timor-Leste, Fernando da Costa, hatete husi sira nian relatóriu peskiza ba diversifikasaun ekonomia Timor-Leste hatudu katak rai iha setór potensiál sira hanesan produsaun agrikultura sira kuaze ektare rihun 70 maka abandonadu.

Tanba ne’e Governu presiza rezolve lalais kestaun ne’e atubele fó serteza nune’e bele permite komunidade sira halo fali atividade ba rai abandonadu sira ne’ebé husik.

“Ita nian rai ba iha setór turizmu no mós rai ba potensialidade ba setór agrikultura ne’ebé tuir ami nian peskiza kuaze abandonadu, nune’e mós rai ba poténsia turizmu nian barak maka abandonadu, tanba ne’e husu ba ita-nia Governu atu rezolve, ne’e kauza husi estatutu rai”, dehan Jerente Oxfam.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here