DILI, 26 setembru 2019 (TATOLI) – Prezidente Cruz Vermelha Timor-Leste (CVTL), Madalena Hanjam, informa durante ne’e sira nia parte promove banku raan ba komunidade iha área remota, hanesan parte ida atu tulun Ministériu Saúde.
“Servisu ne’ebé Cruz Vermelha halo barak mak iha progresu ona. Entaun ami nunka sente kolen atu hala’o ami ninia atividade iha sidade no munisípiu sira, nune’e mós iha área remota sira,” tenik Madalena Hanjam iha resintu PN, kinta ne’e.
Nia dehan, servisu seluk ne’ebé mak CVTL halo mak dada bee moos ba ema kbiit-laek no halo treinamentu primeiru sekoru ba juventude atu bele suporta joven foti desizaun ba-aan rasik.
Prezidente Cruz Vermelha subliña, orsamentu ba CVTL hodi hala’o atividade durante ne’e hetan apoiu hosi Governu no parseiru internasionál sira.
“Ami hetan apoiu hosi parte hotu no Cruz Vermelha iha amigu barak hosi fatin oioin. Kona-ba orsamentu ne’ebé mak ami utiliza durante ne’e barak tanba nesisidade povu nian. Iha atividade balun mak komunidade sira mak tau rasik osan hanesan atu dada bee moos presiza osan $20.000, entaun komunidade tenke buka $5.000 no ami tau $15.000 nune’e bele hadia povu nia vida,” nia akresenta.
Nia subliña, serbisu seluk ne’ebé mak CVTL halo mak bainhira iha funu bele tun hodi ajuda maibé bainhira funu laiha CVTL hala’o atividade prevensaun no hatutan moris.
Jornalista: Horteçio Sanchez
Editór: Xisto Freitas
