Primeiru-Ministru, Taur Matan Ruak. Imajen Tatoli/Cipriano Colo

DILI, 26 setembru 2019 (TATOLI) – Enkontru semanál entre Primeiru-Ministru (PM), Taur Matan Ruak, ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité,  ohin, Xefe Governu informa kona-ba debate orsamentu jerál Estadu (OJE) tinan 2020.

Hafoin enkontru, Primeiru-Ministru hateten katak, aban (27/9) , liuhusi reuniaun Konsellu Ministru sei aprova proposta OJE 2020 nian.

Nia sita mós kona-ba totál proposta OJE iha inísiu hamutuk billaun $1.7, maibé liuhusi debate, mak montante orsamentu ne’e sei aumenta.

Taur fó hanoin katak, Komisaun Revizaun Orsamentu rasik iha 7 setembru liubá, hahú hala’o debate kona-ba planu orsamentu ne’ebé kada órgaun Estadu propoin.

Kona-ba aumentu montante orsamentu ne’e, Primeiru-Ministru informa katak aban mak foin bele hatene montante hira mak sei aumenta.

Iha oportunidade ne’e, Primeiru-Ministru informa mós kona-ba konferénsia internasionál ne’ebé Autoridade Nasionál Petróleu no Minerál (ANPM) realiza kona-ba loke kontratu ba bloku sira iha Tasi Timor.

Tuir planu, konferénsia ne’e sei hala’o iha loron 3-4 outubru tinan ne’e.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here