Atividade iha Jináziu Dili. Imajen TATOLI/Hortençio Sanchez

DILI, 25 setembru 2019 (TATOLI) – Diretora Administrasaun no Finansa Sekretaria Estadu Juventude no Desportu (SEJD), Maria Luisa Monteiro, informa kona-ba reabilitasaun  Jináziú Dili dadaun ne’e iha hela prosesu konkursu no sei fó oportunidade de’it ba kompañia lokál.

“Jináziú Dili agora dadaun iha hela prosesu konkursu. Iha fulan kotuk ita loke ona prosesu maibé la konsege hetan kompañia ne’ebé mak sai hanesan vensedór, entaun loke fila-fali”, tenik Diretora ba Agência Tatoli, foin lais ne’e.

Aleinde ne’e, SEJD mós loke konkursu hodi halo kampu volei-tasi no agora dadaun iha ona kompañia hammutuk 22 mak submete ona dokumentu hodi konkorre.

“Kompañia sira submete tiha dokumentu mai no ekipa ida sei halo fali avaliasaun. Karik haree kompañia balun prienxe kritériu entaun ekipa sei hato’o fali relatóriu ba Sekretaria Estadu Juventude no Desportu hafoin Sekretáriu Estadu foti desizaun ba kompañia ne’ebé mak merese duni atu reabilita Jináziú Dili no kampu volei-tasi”, nia dehan.

Tuir Maria Luisa, kompañia hirak ne’ebé atu kompete mesak iha esperiénsia tanba kaer ona obra Estadu nian durante ne’e.

Entretantu, reabilitasaun Jináziú Dili atu prepara ba jogu desportivu ba modalidade oioin husi Komunidade Ko’alia Lian Portugés (CPLP-sigla portugés), ne’ebé sei halo tinan oin no Timor-Leste sei sai uma-na’in.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here