Ministru Interio interinu, Filomeno Paixão de Jesus akompaña husi Komandante PNTL, Komisariu Polisia Faustino da Costa no ofisiaís PNTL sira aprezenta orsamentu ba Komité Revizaun Orsamentu Politika. Imajen/GPM

DILI, 25 setembru 2019 (TATOLI)—Governu liu husi Primeiru-Ministru, Taur Matan Ruak, seidauk bele autoriza no husu adia pedidu Komandu Polisia Nasionál Timor-Leste (PNTL) nian atu halo rekrutamentu ba kadete PNTL foun na’in 500 iha tinan 2020.

Notísia Relevante : PNTL Prepara Ona Estatutu Foun no Revee Lei Orgánika

Xefe Governu  husu ba Ministru Interiór interinu, Filomeno Paixão de Jesus no Komandante PNTL, Komisáriu Polisia Faustino da Costa, atu hadi’a uluk problemata uma laran, liu-liu prepara proposta revee lejizlasaun sira iha PNTL.

“Foin daudauk ami ba propoin rekrutamentu ba PNTL foun ba Primeiru-Ministru, Taur Matan Ruak no Komité  Revizaun Orsamentu Polítika (KROP), mas la hatán proposta ne’e la liu. Primeiru-Ministru ko’alia dehan hadi’a lai uma laran, aruma halo di’ak hotu maka foin halo rekrutamentu para ema mai labele iha tan problema,” informa Ministru Filomeno ba jornalista iha Timor Plaza, Dili, tersa (24/09/2019).

PM Taur hatene katak, Komandu PNTL sei iha hela ho ninia problema Komandu PNTL dezde ukun aan iha 2000 too agora seidauk iha estatutu PNTL, presiza halo revizaun ba lei organiza sira inklui revee lei dixiplinár nian di’ak hotu para dezenvolve Komandu PNTL ho di’ak liután.

Ministru Filomeno da Paixão de Jesus hateten, Komandu PNTL tenke hakru’uk ba estratéjia polítika governu hanesan komandu mak komanda polítika no soldadu sira la’o tuir de’it orientasaun komandu nian.

Antes ne’e, Komandante PNTL, Komisáriu Polisia Faustino da Costa dehan, sira prevee orsamentu atu rekruta membru PNTL foun hodi koloka ba postu polisia sira ne’ebé sei menus.

Alende ida ne’e, membru PNTL 140 ne’ebé tama ona ba idade reforma presiza iha ema foun atu troka sira nia fatin hodi hein mós estatutu PNTL nian ne’ebé sei aprezenta ba Konsellu Ministru seidauk hetan aprovasaun.

Jornalista : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here