Prezidente Movimentu Tasi Moos, Gally Soares Araújo. Imajen/Tatoli.

DILI, 25 setembru 2019 (TATOLI) – Organizasaun Movimentu Tasi Moos identifika tempu udan volume fo’er aumenta, tanba lixu mai hosi mota bainhira ema soe lixu iha mota laran.

“Ita laiha ekipamentu ne’ebé konsege halo filtrasaun ba fo’er hotu ne’ebé besik tasi-ninin, entaun fo’er bá para hotu iha tasi-laran”, Koordenadór Jéral Movimentu Tasi Moos, Gally Soares Araújo, iha ámbitu konferénsia imprensa kona-ba Loron Mundiál Turizmu iha Sentru Konvensaun Dili (CCD, sigla portugés), ohin.

Nia subliña área ne’ebé volume lixu barak liu maka hanesan iha Kristu-Rei, Dolok-oan (Kristu-Rei kotuk), área Pelican Paradise.

“Ami identifika beibeik ona katak ema hirak ne’ebé halo atividade negósiu envéz lori fo’er ba fakar iha Tibar, maibé aproveita tempu kalan maka lori sira-nia lixu bá fakar iha dalan”, dehan.

Tanba ne’e, Movimentu Tasi Moos husu tulun ba Polísia hodi kontrola di’ak liután ba jestaun lixu, tanba turizmu Timor-Leste presiza turizmu ida di’ak, kualidade. Atu hasa’e kualidade turizmu iha Timor-Leste, entaun presiza ema hotu nia kontribuisaun, la’ós Governu no empreza de’it, tanba ita maka prodús lixu barak liu.

Aléinde Dili, Movimentu Tasi Moos mós identifika volume lixu barak iha fatin turístiku hanesan Ramelau, lixu ne’ebé iha maioria mai hosi joven sira, tanba kada semana iha loron kinta sira hahú bá Ramelau no sira fila husi ne’ebá, soe hela lixu iha fatin refere.

“Zona turizmu importante tebes liuliu prezervasaun, husi ami-nia movimentu dezde ami eziste, ami hakbesik-aan ona ba instituisaun sira no ami foka liu ba estudante sira, nune’e mós institusaun Estadu hanesan FALINTIL-Forsa Defeza Timor-Leste (F-FDTL) hodi fó formasaun kona-ba jestaun lixu no husi parseiru internasionál balun fó fiar mai ami hodi fahe informasaun ho voluntáriu”, realsa.

Koordenadór hosi Movimentu Tasi Moos kompromete sei koopera ho Governu hodi hadi’ak jestaun lixu iha Timor-Leste.

Jornalista : Antónia Gusmão

Editora      : Maria Auxliadora

HAKEREK NO HATÁN

Please enter your comment!
Please enter your name here