Primeiru-Ministru, Taur Matan Ruak, prezide Reuniaun Konsellu Ministru iha Palásiu Governu, Dili, Kuarta (25/09/2019). Imajen/TATOLI.

DILI, 25 setembru 2019 (TATOLI) – VIII Governu Konstitusionál liuhosi desizaun Konsellu Ministru, aprova votu pezar ba Padre João de Deus Pires ne’ebé hakotu iis iha 22 setembru, iha Hospital Nacional Guido Valadares (HNGV) tanba moras komplikasaun.

Ministru Estadu Prezidénsia Konsellu Ministru, Hermenegildo Augusto Cabral Pereira, hateten votu pezar ne’e atu tuir dalan Parlamentu Nasionál (PN) ne’ebé antes ne’e halo ona votu pezar ba matebian Padre João de Deus.

Notísia Relevante: PN Fó Votu Pezár ba Padre João de Deus

“Konsellu Ministru aprova votu pezar ida husi Primeiru-Ministru, Taur Matan Ruak rasik, ne’ebé fó hanoin ba Konsellu Ministru kona-ba Padre nia papél patriótiku durante luta libertasaun nasionál. Durante luta ne’e matebian Amu João de Deus iha interasaun maka’as ho Xanana Gusmão no mós saudozu David Alex Daitula”, nia tenik ba jornalista sira iha Palásiu Governu, kuarta ne’e.

Padre João de Deus ninia obra nafatin marka iha istória Timor-Leste, durante okupasaun Indonézia no sei la haluha espíritu altruísta misionáriu ne’e tanba nu’udar grande lutadór ba liberdade povu timoroan ne’ebé kompromete atu serví hanesan Padre no umanista.

Notísia Relevante: In Memoriam: Pe. João de Deus, “Cala-te e Vai”

“Iha momentu tristeza ne’e, relijiozu sira, povu timoroan ein-jerál no Governu aprezenta sentidu kondolénsia ba família estimadu Padre João de Deus, Igreja Katólika no família saleziana Timor-Leste”, haktuir nota komunikadu governu.

Jornalista: Julia Chatarina

Editór: Xisto Freitas

 

 

HAKEREK NO HATÁN

Please enter your comment!
Please enter your name here