Deputadu Partidu Demokrátiku (PD), Adriano do Nascimento. Imajen TATOLI/António Goncalves

DILI, 25 setembru 2019 (TATOLI) – Deputadu Bankada Partidu Demokrátiku (PD), Adriano do Nascimento, hateten Timor-Leste bele halo rekonsiliasaun ho Indonézia maibé atu halo diálogu entre líder nasionál sira hodi solusiona inserteja polítika labele.

Nia lamenta ho deklarasaun husi polítiku balun ne’ebé lakohi halo diálogu tanba konsidera diálogu rasik la hakerek iha Konstituisaun.

“Ita halo diálogu ho Indonézia liuhosi rekonsiliasaun maibé nusa mak diálogu hodi rezolve ita-nia problema labele. Nusa mak timoroan labele halo diálogu. PD nia prinsípiu mak tenke tuur hamutuk”, tenik Deputadu bankada opozisaun ne’e ba jornalista sira iha Parlamentu Nasionál (PN), kuarta ne’e.

Nia ko’alia asuntu ne’e relasiona ho membru governu indijitadu sira ne’ebé mak to’o agora seidauk hetan pose.

Tanba ne’e, nia husu atu líder nasionál sira tenke tuur hamutuk hodi halo diálogu.

Nia mós haktuir, iha tinan 2013, PD sakrifika-aan hodi FRETILIN tama iha estrutura Governu.

“Ha’u rasik ema hasai inklui membru lubuk ida ema hasai maibé ami iha konsisténsia tanba nasaun nia di’ak hasai ema ida la’ós kestaun. Ami vota a-favór nafatin no ami nein kontra buat ida. Ami entende labele husik partidu ida iha li’ur, ita tenke hamutuk. Tanba ne’e mak 2013 mosu konsensu nasionál to’o 2017”, nia akresenta.

Deputadu ne’e dehan tan,  líder sira labele dehan laiha problema enkuantu povu hatene iha polítika ódiu no vigansa tanba ne’e líder sira tenke nakloke-aan.

“Ita gasta osan ba g7+ para ema sira hadame malu no hadomi malu, nusa mak ita labele dame malu. Ita tau osan ba g7+ atu ema sira ne’e tuur hamutuk halo diálogu, nusá mak ita la halo diálogu”, nia lamenta.

Parte seluk, Deputadu Bankada PLP, Francisco Vasconcelhos, konsidera fukun hosi problema sira ne’e hotu tanba Prezidente Repúblika, Fransisco Guterres Lú Olo, ladauk fó pose ba membru governu indijitadu na’in-sia.

“Prezidente Repúblika mak toma responsabilidade ba ida ne’e. Se ema sira ne’e iha sala tenke justifika tanba ida ne’e kompeténsia Tribunál nian la’ós Prezidente Repúblika”, nia subliña.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here