Governu Prevee Orsamentu Rihun $11 Selebra Loron Mundiál Turizmu

Asesór Prinsipál MTKI, Jacinto Rigoberto (Loos) Hamutuk Ho Komandante PNTL Municipio Dili (Karuk), Armando Monteiro No Diretór Jerál Turizmu, José Filipe Dias Quintas (Klaran) Hala’o Konferénsia Imprensa Kona-ba Loron Mundial Turismo ba Dia 27 Setembru 2019. Iha Salaun Sentru Konvensaun Dili (CCD). Kuarta,(25/09/2019). Imajen/Tatoli.

DILI, 25 setembru 2019 (TATOLI) – Governu liuhosi Ministériu Turizmu, Komérsiu no Indústria (MTCI-sigla portugés) prevee osan rihun $11 hodi selebra Loron Mundiál Turizmu ba dala-39, ne’ebé sei akontese iha 27 setembru 2019, maski nune’e, Timor-Leste selebra ba dala-14 tanba sai membru ba organizasaun mundiál iha 2005.

“MTKI selebra loron mundiál turizmu, tanba Governu rekoñese setór turizmu importante ba nasaun”, Diretór Jerál Turizmu, José Filipe Quintas, liuhosi konferénsia imprensa iha Sentru Konvensaun Dili (CCD-sigla portugés), ohin.

José Quintas hatutan selebrasaun ho tema “Oinsá kontinua promove imajen Timor-Leste nu’udar destinasaun turístika ida seguru”.

Selebrasaun ne’e sei organiza semináriu ne’ebé koopera ho Ajénsia Nasaun Naklibur Amérika ba Dezenvolvimentu Internasionál USAID-sigla Inglés), Sekretaria Estadu Formasaun Profesionál no Empregu (SEFOPE) no universitáriu atu ko’alia kona-ba turizmu no empregu, iha loron 26 setembru.

Nia akresenta 2019 tema mundiál ba selebrasaun maka “Turizmu ho Empregu maibé nasaun ida-idak deside nia tópiku rasik, maka Timor-Leste hili; “Oinsá kontinua promove imajen Timor-Leste nu’udar destinasaun turístika ida seguru”.

Atividade ne’e sei halo diskusaun hodi haree ba Planu Estratéjiku Nasionál Turizmu ba 2030 ne’ebé aliña ho Planu Estratéjiku Dezenvolvimentu Nasionál (PEDN), 2011 to’o 2030.

Programa seluk mak limpeza jerál, liuliu iha sítiu turístiku sira, sei envolve Movimentu Tasi Moos, Universitáriu sira no sei remata ho jinástika (Zumba) iha Kristu-Rei.

Enkuantu iha 29 setembru, sei realiza mós kampaña kona-ba jestaun lixu, katak voluntáriu sira sei la’o iha dalan tasi-ibun no fatin turístiku hodi fó hanoin ba komunidade, liuliu vizitante sira atu soe lixu iha nia fatin, tanba volume lixu barak liu iha loron sábadu.

Atividade hirak ne’e sei realiza tanba serbisu hamutuk entre MTKI ho Komandu Polísia Munisípiu Dili, USAID, Movimentu Tasi Moos no universitáriu.

Entretantu, tuir planu iha 2020, atividade ne’e sei selebra iha munisípiu ho objetivu, komunidade iha munisípiu mós bele sente katak indústria turizmu ne’e importante ba sira, tanba dadus hatudu turista mai Timor-Leste la’ós de’it iha Dili, maibé mós ba munisípiu, hanesan Likisá, Maubisi no fatin seluk.

Jornalista : Antónia Gusmão

Editora : Maria Auxiliadora