Primeiru-Ministru, Taur Matan Ruak, prezide Reuniaun Konsellu Ministru iha Palásiu Governu, Dili, Kuarta (25/09/2019). Imajen/TATOLI.

DILI, 25 setembru 2019 (TATOLI) – Ministru Estadu Prezidénsia Konsellu Ministru, Hermenegildo Augusto Cabral Pereira, informa reuniaun ordináriu ezekutivu sira iha kuarta ne’e aprova proposta deliberasaun husi Ministru Defeza no Seguransa, Filomeno da Paixão de Jesus kona-ba integrasaun FALINTIL-Forsa Defeza Timor-Leste (F-FDTL) ba misaun Organizasaunn Nasaun Unida (ONU) iha Repúblika Sentru-Afrikana.

“Konsellu Ministru aprova proposta husi Ministru Defeza kona-ba militár F-FDTL nian atu integra iha Forsa Armada Portugal atu ba halo misaun pás iha Repúblika Sentru-Afrikana”, nia tenik ba jornalista sira iha Palásiu Governu, kuarta ne’e.

Militár F-FDTL sei hamutuk ho Forsa Armada Portugal sei manda ba Repúblika Sentru-Afrikana iha kuadru Misaun Multi-dimensionál, ne’ebé ikus mai sei integra iha ONU atu estabiliza situasaun iha kontinente Áfrika.

Iha biban hanesan, Ministru Interiór (MI) Interinu, Filomeno Paixão ho ninia ekipa halo aprezentasaun ba konsellu Ministru kona-ba prioridade infraestrutura MI, liliu halo konstrusaun ba postu Polísia Nasionál Timor-Leste (PNTL) iha suku hotu.

Tuir baze vizaun, misaun no planu estratéjiku atu moderniza PNTL ho objetivu atu reforsa Polísia Komunitária nune’e bele garante seguransa ba populasaun, hamutuk ho apoiu kooperasaun husi Neozelandeza.

Nune’e, aprezenta planu konstrusaun ida to’o tinan 2030 ba edifísiu Polísia Komunitária Suku hamutuk 452 iha munisípiu 12 inklui Rejiaun Administrativa Espesiál Oé-cusse Ambeno (RAEOA).

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here