Deputadu Khunto, Antonio Verdial. Imajen TATOLI/Antonio Gonçalves

DILI, 24 setembru 2019 (TATOLI) – Deputadu Bankada Kmanek Haburas Unidade Nasionál Timoroan (KHUNTO), António Verdial, hateten Servisu Nasionál Kadastru (SNC-sigla portugés) tenke ho estatutu autónomu tanba haree liubá servisu levantamentu dadus ba rai no dalaruma enfrenta problema barak iha terrenu.

Eis Diretór Terra no Priopriedade ne’e observa, durante ne’e sempre mosu problema rai entre komunidade ho komunidade no komunidade ho Estadu, tanba ne’e polítika KHUNTO nian hakarak SNC labele tutela iha ministériu ida.

“Tenke revee. Tanba ne’e mak polítika partidu KHUNTO nian dezde uluk partidu ne’e hamriik hakarak Servisu Nasionál Kadastrál ne’e autónomu. Labele iha Ministériu Justisa nia okos”, nia tenik iha Parlamentu Nasionál, tersa ne’e.

Deputadu Bankada Governu ne’e subliña, projetu SNC ne’ebé hala’o agora atu hatutan de’it projetu Ita-Nia Rai ne’ebé uluk halo ona no projetu ne’e seidauk bele atribui sertifikadu.

“Seidauk iha lei ida mak dehan katak ne’e mak sertifikadu. Tanba ne’e, ha’u husu ba Governu tenke tau hanesan organizasaun boot ida hodi organiza situasaun atu ita bele identifika riku-soin, hanesan bahasa dehan mana tanah negara, mana tanah wilayah, mana tanah adat”, nia akresenta.

António Verdial esplika, servisu fundamentál SNC nian iha baze mak atu identifika kazu no problema kona-ba rai iha territóriu.

Tuir planu, Governu liuhosi SNC sei halo levantamentu parsela hamutuk 300.000 iha territóriu laran tomak.

SNC lansa iha loron 25 jullu 2014 husi eis Primeiru-Ministru, Kay Rala Xanana Gusmão, Primeiru-Ministru Portugal, Pedro Passos Coelho hamutuk ho eis Ministru Justisa, Dionísio Babo

Projetu ho millaun $57,2 ne’e ho intensaun atu halo levantamentu ba rai hodi hatama dadus ba sistema modernu ho teknolójia foun.

Projetu ne’e realiza tanba servisu hamutuk entre kompañia Grupo Média Nacional (GMN) ho kompañia Holding Arm Apprize hosi Portugál nian hodi halo levantamentu kadastrál iha distritu sira.

Governu lansa projetu ne’e tanba durante okupasaun portugés to’o agora Timor-Leste seidauk iha Sistema Kadastru Nasionál hodi akumula dadus kona-ba rai. Tanba ne’e, projetu ne’e sei la’o durante tinan 6 nia laran hodi halo levantamentu dadus ba rai iha territóriu Timor tomak.

Timoroan sira ne’ebé tuir formasaun no integra iha projetu ne’e hamutuk na’in 150.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here