Mapa Baucau

BAUCAU, 25 setembru 2019 (TATOLI)—Prezidente Autoridade Munisipál Baucau, António Guterres, informa entermus rekursu umanu Baucau oan prontu atu simu Polítika Desentralizasaun ne’ebé Governu Sentrál atu implementa.

Prezidente Autoridade Munisipiu Baucau, António Guterres. Foto TATOLI: Cancio Ximenes

Em termo rekursu umanu, Munisípiu Baucau preparadu. Ami la bele sura ami-nia aan iha uma laran  de’it. Baucau oan prontu. Intelektuál Baucau oan iha li´ur ne’e prontu. Iha tinan 2013, ami  reuniaun tiha ona, ami-nia prontidaun atu sai munisípiu ne’e iha ona maibé fazeadamente la’o ne’e mak seidauk. Área oin-oin ami identifika no envolvimentu ativu no parsipativu ba polítika ida ne’e, ami hatene katak Baucau oan hotu tenke envolve,” dehan Prezidente Autoridade Munisipál Baucau, António Guterres, ba Ajénsia TATOLI liuhusi entrevista iha nia knar fatin, Baucau Vila Nova, kuarta (25/09/2019).

Polítika Desentralizasaun, nia hatutan, daudaun ne’e la’o tiha ona polítika desentralizasaun administrativa durante tinan tolu ona. Agora atu reforsa polítika ida ne’e, Governu Sentrál mai reforsa tan polítika desentralizasaun institusionál.

“Polítika desentralizasaun ninia konseitu reál mak ida ne’e. Rekursu umanu, ekipamentu, rekursu finanseiru no kondisaun,” nia dehan.

Atu reforsa rekursu umanu no polítika institusionál, nia informa, agora daudaun Governu Sentrál serbisu hamutuk ho Uniaun Europeia fó tiha ona formasaun ba funsonáriu kargu sefia hanesan administradór postu no xefe departamentu sira kona-ba jestaun finansa publika no planeamentu para rekursu sira ne’e preparadu em termos kualidade.

“Agora daudaun Governu Sentrál mai halo hela formasaun ba funsionáriu sira iha Munisípiu Baucau tanba Baucau mak sai sentru formasaun ba Dili, Liquiça, Viqueque, Manatuto. Semana kotuk mak foin akaba. Agora daudaun INAP fó hela formasaun baziku ba planeamentu na lider komunitáriu sira,” nia hateten.

Agora, nia haktuir, Polítika Desentralizasaun ba desentralizasaun politika territoriál ne’e mak avaliasaun kondisaun mínimu entaun autoridade munisípal agora daudaun ne’e atu hamosu polítika desentralizasaun órgaun ezekutivu no órgaun lejislativu ne’ebé sei envolve Baucau oan sira hotu.

“Baucau ne’e Baucau oan ninian no ba Baucau oan sira hotu. Ne’e mak ami sempre hatete beibeik katak ‘Hamutuk Baucau Ida Ba Baucau Oan Tomak’. Krítika bele krítika maibé ba Baucau nia dezenvolvimentu Baucau oan tenke kontribui hodi dezenvolve Baucau sai Baucau Mututaba,” Prezidente Autoridade Munisipál Baucau, Antonio Guterres, esplika.

Notísia relevante:INAP Oferese Treinamentu Ba Lider Komunitária Iha Munisípiu Baucau

Jornalista: Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here