Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 25 setembru 2019 (TATOLI) – Prezidente Parlamentu Nasionál, Arão Noé de Jesus da Costa Amaral, hateten pedidu viajen Prezidente Repúblika (PR), Francisco Guterres Lú Olo, ba Indonézia no Japaun depende desizaun plenária iha loron 30 fulan ne’e.

Asuntu ne’e Prezidente Parlamentu Nasionál (PN) relata ona ba Prezidente Repúblika durante enkontru mensál iha Palásiu Prezidente Nicolau Lobato, Bairru Pité, ohin.

“Kona-ba dezlokasaun PR nian ba Indonézia no Japaun, depende ba desizaun plenária. Prezidente PN labele halo komentáriu tanba Prezidente PN jere de’it meza”, Arão afirma.

Lee mós: Horta Husu PN Autoriza Xefe Estadu ba Indonézia-Japaun

Durante enkontru ne’e mós nia hato’o kona-ba atividade PN nian durante fulan ida nia laran, liliu kona-ba atividade sira iha tempu resesu, vizita komparativu hosi komisaun sira ba estranjeiru.

Levanta mós kona-ba pedidu ne’ebé mai hosi Asembleia Parlamentár ASEAN nian, ne’ebé husu Parlamentu Timor-Leste atu adere hanesan membru permanente. Iha mós karta hosi Sekretáriu Jerál Uniaun Parlamentár ne’ebé husu ba Parlamentu Timor-Leste (TL) atu ratifika tratadu kona-ba arma nukleár tanba entre nasaun 180 resin inklui TL seidauk ratifika.

Kona-ba ida ne’e, Prezidente Repúblika mós fó ninia apresiasaun tanba nasaun ki’ik sira sempre ezije atu TL bele adere.

Prezidente Parlamentu mós aprezenta ba Prezidente Repúblika katak, atu ratifika buat sira ne’e, kabe ba kompeténsia Governu. Prezidente PN sei haruka karta ba Primeiru-Ministru, Taur Matan Ruak no Ministru Negósiu Estranjeiru no Kooperasaun atu bele aselera prosesu kona-ba tratadu arma nukleár.

Asuntu seluk, aprezenta kona-ba Governu ne’ebé kompromete atu aprezenta orsamentu jerál Estadu (OJE) tinan 2020 iha 15 outubru, nune’e Arão hein katak rohan hosi tinan ne’e bele hetan ona aprovasaun.

Aprezenta mós kona-ba lejizlasaun haat kompostu hosi, primeiru, Lei Antí Korrupsaun, ne’ebé oras ne’e Komisaun A (Asuntu Lei, Justisa no Podér Lokál) debate hela iha faze espesialidade. Segundu, lei seluk ne’ebé oras ne’e Komisaun D (Asuntu Ekonomia no Dezenvolvimentu) prepara hela relatóriu atu halo pareser mai plenária hodi bele aprova iha jeneralidade.

Terseiru, Lei Atividade Petrolífera no Lei Fundu Petrolíferu ne’ebé Xefe Estadu veta tanba Tribunál Rekursu deklara inkonstitusionalidade no Arão informa ba PR katak iha loron 8 outubru sei ba ajenda hodi halo apresiasaun oinsá bele foti desizaun.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here