DILI, 25 setembru 2019 (TATOLI) – Prezidente Autoridade Nasionál Komunikasaun (ANC-sigla portugés), João Olívio Freitas, informa iha tinan ne’e, ANC sei lansa Internet Exchange Point (IXP).

“Ita sei lansa Internet Exchange Point hafoin haree sustentabilidade”, João Freitas ba Ajénsia Tatoli iha nia serbisu fatin, Kaikoli, ohin.

Entretantu, iha 2020, ANC sei prioritiza área hirak ne’ebé iha, atu fortifika rede Timor-Leste Resource and Education Network. Rede ne’e ANC introdús ba universidade sira iha rai-laran atu halo peskiza ka sai peskiza nasionál.

“Ida ne’e ba tinan oin, ANC liga ba universidade sira atu bele hetan asesu ba rede, tanba daudaun  ne’e, iha ona ligasaun ba rede ida hanaran fiber ótika UNTL no DIT ne’ebé estabelese ona”, adianta nia.

Nune’e, tinan oin, ANC dada tan rede hosi eskola Institutu Teknolojia Dili (DIT, sigla inglés) ba universidade sira seluk.

Aléinde ne’e, ANC sei halo produsaun ba regulamentu nesesáriu sira liga ba protesaun konsumidora serbisu telekomunikasaun nian, atu oinsá bele proteje konsumidór sira nia sasan saida maka atubele asegura.

Tuir fali, ANC sei hola ekipamentu electro magnetic field meter, ho objetivu atu asegura populasaun hirak ne’ebé hela besik torre telekomunikasaun no torre rádiu difuzaun televiziva tenke seguru radiasaun hosi elektro-magnétiku. Nune’e mós sei asegura nafatin sistema komunikasaun ne’ebé sei lansa ligadu ba rejistu kartaun SIM.

“Ami sei foka ba ida ne’e hodi populasaun bele livre no seguru husi radiasaun refere”, konklui.

Jornalista : Natalino Costa

Editora : Maria Auxiliadora  

HAKEREK NO HATÁN

Please enter your comment!
Please enter your name here