Sesaun plenária Parlamentu Nasionál. Imajen dok. Tatoli

DILI, 25 setembru 2019 (TATOLI) – Maski Prezidente Repúblika (PR), Francisco Guterres Lú Olo seidauk fó pose ba membru governu indijitadu na’in-sia, maibé koligasaun Aliansa Mudansa ba Progresu (AMP), ne’ebé kompostu husi partidu CNRT, PLP no KHUNTO, hakarak mantein estrutura governu atuál to’o mandatu ramata.

Deputadu Bankada PLP, Francisco Vasconcelos, hateten desizaun másimu Aliansa Maioria Parlamentár ne’e iha Konsellu Diretiva nia liman tanba bainhira AMP halo konferénsia iha otél Golgota deside ona katak sei mantein kandidatu na’in-sia, nune’e mós povu fó fiar ba koligasaun ne’e liuhosi eleisaun antisipada katak AMP mak di’ak liu hodi forma governu ho kompeténsia rasik.

Notísia Relevante: Konferénsia Nasionál AMP Hamosu Desizaun Importante Neen

“Prezidente Repúblika mak tenke fó dalan seluk mai. Bainhira dehan sira ne’e komete krime tenke hatudu faktu tanba krime la’ós Prezidente Repúblika mak ko’alia maibé Ministériu Públiku mak ko’alia. AMP mantein ho ida ne’e to’o mandatu tinan lima”, tenik Deputadu Vasconcelos ba jornalista sira iha resintu Parlamentu Nasionál (PN), kuarta ne’e.

Tuir nia, bainhira hakarak ta’is ema tenke liuhosi eleisaun la’ós iha dalan klaran.

“Prezidente Repúblika labele kahur sasán ne’ebé kompeténsia Tribunál nian. Se sira ne’e komete duni atu korrupsaun ne’e kompeténsia Tribunál tanba ne’e mak laiha razaun hodi la fó pose tanba tinan ida tiha ona”, hateten Deputadu PLP ne’e.

Parte seluk, Xefe Bankada FRETILIN, Aniceto Guterres, konsidera PR iha razaun bainhira seidauk fó pose ba membru governu indijitadu.

“La’ós kestaun viola ka la viola Konstituisaun maibé hanesan kestaun morál no étika. Ha’u la hatene iha rai ida ne’e bainhira Xefe Estadu rejeita fó pose individu ida atu ba okupa kargu atu ba ukun para sai ezemplu ba povu tomak, maibé individu ne’e iha indísiu krime ruma tuir morál no étika ne’e sala ka loos”, nia kestiona.

Deputadu Bankada KHUNTO, António Verdial, ne’ebé tama mós lista membru governu indijitadu (ikus mai rezigna-aan husi lista), husu PR atu fó sai indísiu krime ne’ebé komete atu bele ba hatán iha Tribunál.

“Ha’u, António Verdial sei asume responsabilidade iha justisa nia oin”, dehan Deputadu Bankada Governu ne’e.

Hatán ba kestaun, Ministru Reforma Lejizlativa no Asuntu Parlamentár, Fidelis Leite Magalhães, hateten AMP sei mantein ho lista no sei la troka.

“Pozisaun hosi señor Primeiru-Ministru nafatin. Laiha razaun ruma atu muda kandidatu sira. Iha tempu badak Primeiru-Ministru sei fó sai lala’ok ruma hodi solusiona situasaun ne’e. Laiha razaun, nein étika no morál, nein legál atu troka kandidatu sira ne’e”, dehan Ministru Fidelis.

Governante ne’e realsa, mantein kandidadu na’in-sia ne’e haree ba Konstituisaun no ba prinsípiu fundamentál sira.

Entretantu, membru governu  indijitadu ne’ebé Xefe Estadu seidauk fó pose mak hanesan Ministru Finansa, Helder Lopez, Ministru Turizmu, Komérsiu no Indústria, Francisco Kalbuadi Lay, Minstru Asuntu Kombatente no Libertasaun Nasionál, Virgílio Smith, Ministru Saúde, Sérgio Lobo, Ministru Interiór (deklara rezigna-aan ona), António Verdial, Vise-Ministru Justisa, Amandio Benevides, Vise-Ministru Negósiu Estranjeiru no Kooperasaun, José Turquel.

Enkuantu, Ministru Planeamentu no Investimentu Estratéjiku, Samuel Marçal ho Ministru Petróleu no Rekursu Minerál, Alfredo Pires, PR aseita fó pose, maibé kandidatu na’in-rua ne’e lakohi tanba hakarak fó solidariedade ba kandidatu membru governu nain-hitu seluk.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here