Prezidente Uniaun Nasionál Eskuteiru Timor-Leste (UNE-TL), Idelta Maria Rodrigues. Imajen Tatoli/Cipriano Colo

DILI, 24 setembru 2019 (TATOLI) – Prezidente Uniaun Nasionál Eskuteiru Timor-Leste (UNE-TL), Idelta Maria Rodrigues, halo audiénsia ho Prezidente Repúblika (PR), Francisco Guterres Lú Olo, hodi aprezenta kona-ba difikuldade ne’ebé durante ne’e UNE-TL enfrenta.

Durante audiénsia, Idelta relata mós ba Xefe Estadu kona-ba atividade sira ne’ebé UNE-TL halo ona hodi kontribui ba dezenvolvimentu karater juventude Timor-Leste.

Aleinde ne’e, relata atividade internasionál ne’ebé UNE-TL tenke kumpri hanesan membru Movimentu Eskuteiru Mundiál.

Iha UNE-TL nia programa, oras ne’e esforsu hela atu serbisu hamutuk ho Ministériu Edukasaun, atu implementa atividade extra-kurrikuler ho eskuteiru iha eskola públika Timor-Leste tomak.

Programa ne’e atu ajuda dezenvolve karater juventude sira-nian, tanba eskola la’ós de’it ba aprende siénsia maibé mós fatin ba formasaun karater no interasaun entre juventude.

Hafoin audiénsia, Idelta hateten, Prezidente Repúblika hanesan mós patronu ba UNE-TL, apresia konseitu revolusaun karater tanba ne’e husu atu kontinua fó formasaun ba juventude atu hadomi sira-nia pátria, hatene moris hamutuk ho juventude, iha sosiedade, koñese-aan rasik atu la’o ba objetivu ida.

Entretantu, UNE-TL eziste dezde tempu Indonézia to’o ohin loron ho nia membru atuál rihun sanulu resin ida (11.000).

Prezidente UNE-TL mós kontente tanba ema barak mai husu atu loke agrupamentu, tanba ne’e hanoin ona atu halo preparasaun ho universidade sira, liuhusi serbisu hamutuk ho Governu liliu iha tempu badak sei halo akordu ho Sekretaria Estadu Protesaun Sivíl (SEPS) atu halo prevensaun ba konflitu iha Timor-Leste.

Nia hatutan, buat barak mak UNE-TL sei halo iha tinan oin no sira mós fiar katak liuhusi mídia nia publikasaun bele alarga di’ak liu iha baze kona-ba atividade sira ne’ebé mak sei implementa.

Kona-ba relasaun serbisu hamutuk ho Movimentu Eskuteiru Katólika, Idelta hateten, kooperasaun di’ak tebes tanba bispu sira mós envolve UNE-TL iha Komisaun Organizadora ba Komemorasaun Tinan 30 Vizita Papa João Paulo II iha Timor-Leste.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here