Estudante sira hosi Eskola Ensinu Báziku Bidau, partisipa iha eventu Marsa Justisa Klimátika Iha Dili, ohin. Imajen TATOLI/Egas Cristóvão

DILI, 24 Setembru 2019 (TATOLI)-Ministra Edukasaun Juventude no Desportu (MEJD), Dulce de Jesus Soares hateten katak atu kontribui ba iha Kombate Mudansa Klimátika, MEJD inklui ona matéria espesiál kona-ba jardín eskolár hanesan parte ida atu proteje ambiente, iha kurríkulu eskolár.

Ministériu edukasaun iha primeira no segundu síkulu iha ona matéria kona-ba ambiente  inklui ona iha kurríkulu, no iha mós bloku espesiál ida kona-ba jardín eskolár ne’e hanesan parte ida oinsá atu proteje ambiente, nune’e mós  pratika iha eskola sira ministériu edukasaun parseria ho Prinseza Mahacakri Sindron husi Tailándia ne’ebé maka  fó apoiu ba ita kuaze eskola lima.

Iha jardín eskolár no ministériu rasik tau orsamentu ba apoiu jardín eskolár ba iha eskola hotu.

Ministra Edukasaun, Juventude no Desportu
Dulce de Jesus Soares. Imajen/TATOLI

“Orsamentu la boot maibé orsamentu ki’ik para oinsá atu hasa’e de’it konsiénsia estudante no profesór sira nian atu bele komprende liután oinsá atu proteje ambiente,” informa Ministra Edukasaun Dulce de Jesus Soares ba jornalista sira hafoin partisipa iha Marsa ba mudansa Klimátika iha Ponte BJ Habibi, Bidau, ohin.

Iha fatin hanesan Governante ne’e konsidera atividade ne’e atu haforsa fila fali kultura ne’ebé maka uluk iha ona.

Ida ne’e mós atu reforsa fali kultura ne’ebé maka uluk ita iha, kuandu ita ko’alia kona-ba halo jardín eskolár ita ema Timór orijinál ne’e ita iha ona kostume ida ita kuda ai-hun iha uma hun. Maibé, ita haree katak depois dezenvolvimentu iha buat barak maka lakon.

“Entaun ho ida ne’e ita koko atu lori fila fali ida ne’e ba iha estudante sira atu komprende katak ita presiza uainhira ita kuda ai-horis di’ak ba ambiente, ita mós bele hetan ai-han nutritivu di’ak ba ita-nia saúde, no ekonomikamente hamenus ita-nia gastu tanba envés ita ba sosa iha li’ur ita iha rasik ai-han iha ita-nia uma hun,” dehan ministra.

Ministra Edukasaun Dulce de Jesus Soares akresenta nia partisipasaun iha atividade marsa ba mudansa klimátika ne’e hodi akompaña estudante sira atu espresa sira-nia hanoin oinsá atu proteje ambiente. “Ha’u-nia prezensa iha ne’e atu asiste no rona estudante sira-nia liafuan kona-ba ambiente, ne’e hanesan maneira ida halo estudante sira bele komprende liután kona-ba importánsia husi kuida ambiente no ita mós hatene ona kona-ba ambiente ne’e”.

Iha biban hanesan, Ministra Dulce de Jesus mós hato’o mensajen ba estudante sira no ba públiku atu bele kontribui ba iha mudansa klimátika ne’e ho sensibilidade rasik. Importante, primeiru mak iha ita-nia moris labele soe fo’er arbiru.

“Se ita iha sensibilidade katak ha’u soe fo’er estraga ambiente, se ha’u para soe fo’er ha’u kontribui boot tebes ba iha ambiente ne’e depois governu nia programa para kontinua serbisu atu garante katak ba ema sira ne’ebé maka atu loke serbisu sira ne’e, presiza iha autorizasaun husi Sekretáriu Estadu Meiu Ambiente atu nune’e bele haree katak merese duni atu halo serbisu sira ne’e ka lae atu nune’e la estraga ita-nia ambiente”.

“Tanba ne’e ba hahú asaun ki’ikoan ida ne’ebé maka kada ema hanesan nia an rasik bele kontribui liuhusi labele soe lixu arbiru, simples. Maibé, buat ida la fasil,” nia konsidera.

Enkuantu Berta Antonieta nu’udar peskizadora husi LAO HAMUTUK hateten katak Marsa ne’e nia objetivu mak fó hanoin ba nasaun dezenvolvidu sira ne’ebé prodús karbonu barak liu bele redús tanba tempu to’o ona, ne’e la’ós mudansa klimátiku maibé krize klimátika.

“Entaun ita luta hamutuk ho illa Pasífiku sira, luta ba sira-nia soberanu luta ba ita-nia mundu tomak atu nune’e ita nia moris bele naruk liután,” afirma Peskizadora husi LAO HAMUTUK ne’e.

Nia fó hanoin, atu kombate ida ne’e maka ohin partisipante hotu inklui indivídu, estudante sira no ONG lokál balun partisipa hodi realiza atividade ne’e.

“Ohin ami hatudu ezemplu sae bisikleta, labele sae aviaun barak liu, labele soe fo’er arbiru no liuliu husu nasaun dezenvolvidu sira atu hamenus sira-nia produsaun karbonu no husu ba nasaun boot sira atu hapara ona uza fosil foil, atu uza enerjia renovavel aleinde ne’e Timór mós hapara dependénsia ba petrolíferu,” konklui peskizadora timoroan ne’e.

Jornalista: Nelia Borges

Editór     : Rafy Belo 

HAKEREK NO HATÁN

Please enter your comment!
Please enter your name here